Namar ki khun synrap, ïoh ka Anganwandi na Laitlyngkot ïa ka khusnam na sorkar pdeng
Shillong, Risaw 12 : Ka jingbuddien bad ka jingshimikhia ïa la ka kamram ba la bynshet ka la pynlong ïa ka Anganwadi na Umthli A kaba don ha ki thain Laitlyngkot, Kong Bariphylla Nongsteng ban ïoh pdiang ïa ka khusnam ba kyrpang na ka Ministry of Women & Child Development ka sorkar pdeng.
Ka jingïoh jong ka ïa katei ka khusnam kadei halor ka jingbuddien naduh ba sdang ïa ka koit ka khiah, bad ka jingheh jingplung jong ki khun synrap jong i Kong B Nongsteng.
Katkum ki jingtip ba la ai da u Myntri ka tnad Social Welfare ka sorkar jylla, Bah Paul Lyngdoh la ïathuh ba katei ka Anganwadi ha ka jingbuddien kaba man u bnai na kitei ki khun synrap, ka lap ba i L Nongstep ba dang 1snem shibnai ba dei i khun ba kha ba ar na ki khun synrap jong katei ka longkmie i hap ha ka jingduna ka bam ka dih kaba biang (SAM) namar i don tang 5kilo bad ka jingjrong ba 63cm tad haduh u Lber 2023.
La ïathuh pat ba i khunlung shynrang ba kha synrap lang ka koit ka khiah bad ka jingheh jingplung jong u ka biang.
La ong ba ha ka jingleit jngoh kaba bunsien naduh u Lber 2023 naduh u MO, CDPO, LS, ANM, Anganwadi bad ASHA la pynsngewthuh ïa ki kmie ki kpa ban leit ïalam noh ïa itei i khunlung sha NRC, Shillong. Dang ha kaba nyngkong la ong ba kim kwah hynrei hadien ba la pynsngewthuh naduh ki nongmihkhmat, DC, District MCH Officer, DPO, CDPO, State POSHAN Consultant bad ki nongïalam shnong ba ki kmie ki kpa ki la leit ban ïalam ïa i sha NRC ha ka 17tarik Ïaiong bad shah sumar haduh 4tarik Jymmang 2023.
La ïathuh ba la lap ba i khunlung i don ïa ka SAM bad don jingduna haka jingheh jingsan.
Hadien ka jingleit pyni doktor kaba man ka por bad ka jingbuddien wat ha iing ba ki sah man u bnai da ka Anganwadi bad Lady Supervisor ïa ka koit ka khiah jong i khunlung ryngkat ki bor shnong la pynkynmaw ruh ïa ki kmie ki kpa ba kin pyntikna ïa ka jingleit phah pyni doktor ïa itei i khunlung.
Kumta la ong ba dei ha u Nailur mynta u snem hi ba itei i khunlung i la sdang ban pyni ïa ka jingheh jingplung bad poi ka jingkhia sha ka 6.9 kilo bad jrong 72 cm. Ine i khunlung mynta i la sdang ban shong hi khlem kano kano ka jingkyrshan bad sdang ruh wat ban par.