3 snem rai set along ka Ingbishar ïa u runar uba thmu leh be-ijot ïa ka khynnah rit

Shillong, Risaw, 12: Ka Ingbishar jong u Special Judge (POCSO) West Jaiñtia Hills District, Jowai, ka la rai pynrem bad hukum ban set along ïa u Lucky Dhar haduh lai sngi ryngkat bad ka jingdaiñ kuna kaba T. 5000 hajar.
Katkum u kyrwoh ba la phah da u Superintendent of Police jong ka West Jaiñtia Hills, la pyntip ba ha ka 3 tarik, Ïaiong, 2019 la ujor ïa ka ejahar da ka Kong Ribiang Sumer hakhmat u Officer In-Charge jong ka Amlarem Police Station kaba pynpaw ba ha ka 31 tarik, Lber, 2019, u Lucky Dhar u la pyrshang ban leh be-ijot ïa ka khunrit kaba dang 10 snem ka rta ha ingsah ha ka shnong Pdengshakap, West Jaiñtia Hills District katba kane ka khynnah ka dang ïoh thiah. Katba u Lucky Dhar u dang pyrshang ban jrong kti, ka khynnah ka la kyndit naba ïoh thiah bad sdang ban ïam.
Halor kane ka jingjia, ka Kong Ribiang ka la leit ujor sha u Waheh Shnong bad la ai jingmut ba kan pyntip ïa kane ka jingjia sha ki bor Pulit. Ki Pulit ki la register ïa ka case ha Amlarem Police Station hapoh ka Section 7/8/18 jong ka Protection of Children from Sexual Offence Act (POCSO), 2012 pyrshah ïa u nongshah mudui u Lucky Dhar. La bynshet ha ka WPSI. I. Nongrum ban pynlong ïa ka jingtohkit bad hadien kane la pynkhamti sa ha ka WP. Inspector P.E Marweiñ ban pyndep ïa ka jingtohkit.
Ynda la pyndep ïa ka jingtohkit, la pynngat kyndon pyrshah ïa u Lucky Dhar hapoh ka Section 7/8/18 jong ka POCSO Act halor ka jingdonkti ban jrong kti da kaba thmu ban leh kam bymman pyrshah ïa ka khynnah rit.
Shuh shuh, katkum ki sakhi satar ba la pynshong nongrim ha ka jingshong bishar jong ka Kashari u Special Judge (POCSO) West Jaiñtia Hills District, Jowai, ha ka 29 tarik, Nailur, .2023, ka Kashakri jong u Special Judge (POCSO) Jowai ha ka Special Session (POCSO) Case No. 16 of 2020 ka la lap ba u Lucky Dhar u donkti ban leh ïa kane ka kam beain pyrshah ïa ka khynnah kaba hap hapoh ka kyndon jong ka Section 7 jong ka POCSO Act, 2012.