Shillong, Risaw 12 : Ka North Eastern Council (NEC) ka la bthah ïa ki samla wad kam halor ka jingmih ka jingpynbna thok (false advertisement) ba ka NEC kan bei pisa ha ka jingthungkam nos bad nongsumar ki ban leit trei sha Japan.
Ha ka jingbthah ba la pynmih mynta ka sngi Palei, u Nongaiktien ka NEC ula ong ba ka jingpynbna kaba mih ha ki social media bad katto katne ki lad pathai khubor ha ka taiew ba la leit noh, ki den ki jingpyntip kiba shu thok.
“Ki briew kiba kwah bad ba lah ban trei ïa kine ki kam (eligible) ki dei ban husiar bha bad ban da pynshisha ïa ki jingpynbna thungkam kiba mih ha ki social media bad ki katto katne ki kot khubor khnang ba kin ym mad jingeh namar ka NEC kam ju bei pisa ïa kum kine ki jingthungkam ne ai ram leit pyntbit ïa ki sap” maham u nongaiktien.
Ula ong ba kane ka jingpynbna ka la kam ba ka NEC kab bei pisa ïa 300 ngut ki briew ban thungkam nos bad nongsumar ha Japan bad pynbna ruh ba kan ai ïa ki skill loan ha ka hotel industry.
