Ka sorkar kan ai jingïada pura ïa ki nongtrei 108 tang shu wan shimti da kawei ka kompani

By Mawphor News Desk On Oct 13, 2023

Shillong, Risaw 12: Ka sorkar jylla lane ka tnat ka koit ka khiah ka la kular ban ai ka jingïada ïa la ki nongtrei 108 katkum ki kyndon ka aiñ, lada wan shimti ka Company thymmai ban pynïaid ïa ki kali kit nongpang 108 hadien ba la pyndep ïa ka jingkhot Tender.
ïa kane la pyntip ka Myntri ka tnat ka koit ka khiah kong Ampareen Lyngdoh haba jubab halor ka jingkylli, lano ka Company thymmai kan wan shimti ban pynïaid ïa ki kali kit nongpang 108 hapoh Meghalaya.
Haba kren sha ki lad pathai khubor ka kong Ampareen ka la ïathuh ba ka la dep ban ïakren bad u Managing Director ka tnat National Health Mission (NHM) uba la pyntip ba ka Tnad ka la dep ban khot Tender ïa ki Company kiba kwah ban shimti ban pynïaid ïa ki kali kit nongpang 108 hapoh Meghalaya.
Ka kong Ampareen ka ïathuh ba ha kane ka Tender thymmai ka tnat ka koit ka khiah ka la bsuh ruh ïa ki kyndon na ka bynta ban wanrah ka jingkylla haba ïadei bad ka rukom shakri ïa ki nongpang bad ha ka juh ka por ban ïada ïa ki nongtrei 108 kiba la shakri da ki phew snem ha kane ka kam.
“Haka jingïalang bad u MD ka NHM, la sngewthuh ba yn pyndep ïa ka jingkhot Tender hapoh 2 lane 2 bnai shiteng bad ka sorkar kan nym tuklar eiei haba ïadei bad ka jingthep Tender naka bynta ban pynthikna ba ka Company kaba biang tam kan ïoh ban pynïaid ïa ki kali kit nongpang 108 na ka bynta ka bha ka miat ki paidbah jong ka jylla” ong ka kong Ampareen.
Ka kong Ampareen ka la ïathuh ba ka sorkar ka la bthah ïa ka NHM ban pynthikna ba ka Company ne ki briew ki ban shimti ban pynïaid ïa ki kali kit nongpang ki dei kiba la biang bha ban pynthikna ba ka 108 kan treikam bha ban shakri ïa ka bha ka miat u paidbah ka jylla.
“Ka long kaba shisha ba ki nongtrei 108 ki la kynduh ïa nga bad ki la pynpaw ka jingsngewdiaw ïa ka lawei jong ki lada wan shimti da ka Company thymmai hynrei nga la kular ha ki ba ka Sorkar kan btin lynti bad kan ïada ïa ki katkum ki kyndon ka aiñ khnang ba kin dang lah ban shakri kham bha ïa ki paidbah ka jylla” kala ong.