Shillong, Risaw 12: U Myntri Rangbah ka jylla Meghalaya u Conrad Kongkal Sangma ha ka sngi Palei u la ïakren bad u Myntri ta tnad Rel u Ashwini Vaishnaw ha kaba ïadei bad jingkylla ka Rel North East Express Mail ha Buxar District jong ka jylla Bihar kaba mih na Guwahati ban leit sha Delhi.
Ha kane ka jingjia, san ngut ki briew ki la duhei ïa la ka jingim bad 70 ngut kiwei pat ki la mynsaw jur ha kane ka jingkylla ka rel. Na ka liang jong u Myntri Rangbah ka jylla u la phah wad jingtip la ki don neem ki briew kiba khlad ne mynsaw kiba dei na kane ka jylla Meghalaya.
Napdeng ki 70 ngut kiba la mynsaw jur ki don 37 ngut bad na ka liang jong ka Sorkar Jylla ka dang bteng ïa ka jingïakren bad ki bor ba pynïaid ïa ka tnad Rel ban tip la ki don neem ki briew na kane ka jylla Meghalaya kiba mynsaw ha kane ka jingjia kaba sngewsih ïa kiba mynsaw la pynkit sha AIIMS ha Patna.
Ka tnad Rel ka la pyntip ba la phah da kawei ka Rel ban phah biang ïa ki briew ba kin wan phai biang sha Assam, na ka liang jong ki ophisar na kane ka jylla ki dang bteng ban ïa kren ban lap lada don kiba mynsaw na Meghalaya, lada don ki lah ban telephone ha u helpline number-18003453644.
