Nongpoh, Risaw 12: Ka long shisha ka jingsngew sarong bad ka jingkmen kaba khraw ïaka them Ri-Bhoi hi baroh kawei, namarba ngi la ioh la ka jong ka District mynta la laiphew ne laiphew wei snem mynta. Kadaw ka long haba wan ka District wan rah ruh ki tnad treikam sorkar bapher-bapher naka bynta ka suk ka saiñ bad ka jingmyntoi na ka bynta ki paidbah jong ka Them Ri-Bhoi hi baroh kawei, khamtam kito kiba la nang la stad ban ioh kam ioh jingtrei haki tnad trei kam sorkar bapher-bapher.
Phewse kam long kumta, ka long pynban ka jingsnewsih bad ka jingduh nong kaba khraw, namarba la jan baroh ki kam sorkar naduh kiba rit tam la trei na kiba shabar ka District, yn nai ïa kren ïa kiba heh. Ka jingkylli ka long, “Balei ka long kumne?”. Ka long kumne namarba ym don kita ki briew ne ki kynhun kiba peit ba khmih, kiba bishar kiba khaddar kumno ban leh ïakane naka bynta ban pynioh kam ioh jingtrei ïa ki khun samla kiba la nang la stad jong ka Them Ri-Bhoi.
Haba ngi phai sha ka jingkren ne ka jingpynshai jong iwei na ki nongmihkhmat paidbah jong ka them Ri-Bhoi jong ngi, I Dr. Celestine Lyngdoh I ong ba haka Office Memorandum kala kren shai ba 80% na ki kam kiba don ne kiba lait ha Ri-Bhoi District dei ban ioh da kiba shong ba sah ha Ri-Bhoi, lait noh jia ba don ki Garo kiba shong basah ha Ri-Bhoi kiba apply ne kiba ioh, hynrei baroh 80% dei ban leit shaki trai District. Hynrei kumba long mynta ka long da khongpong, 80% ka leit shabar ka District bad 20% shaki trai District. Haba ka long kumne katno ka long ka jinglehrain bad ka jingduhnong kaba khraw ïa ki khun samla kiba la nang la stad jong ka Them Ri-Bhoi baroh kawei.
Te hakaba ïadei bad kane ka kam ngi la sngewdei ban khot noh daka jingïakynduh lang kaba tang shisien la kumno-kumno. Kumta ban pynsted ïaka kam, ngi sngewbha ban khot kyllum lang ïa phi baroh naduh ki riewrangbah, ki khun samla, ki nongïalam seng bapher-bapher, ki nongïalam shnong, nongïalam riad bad hima baroh kiba don ha Them Ri-Bhoi ba phin sngewbha ban ïapoi khnang-khnang shaka ka jingïakynduh lang ka ban long ha ka 14 tarik Risaw 2023 ha Dorbar Hall Sajer Nongpoh haka por 11baje mynstep naka bynta ban ïa ai mut lang kumno ban thaw noh daka kynja committee ne ka forum khnang ban pyntrei bad ban pynsted noh ïa kane ka kam, kane ka long katkum ka kyrwoh na u Bah CT Nongrum bad Bah PK Syngkli, Umsaw Nongkharai.
