Pynjemkhnap ka SLFC ïa ka SC Bengaluru da 5 kol, ïoh hat trik u Douglas Tardin
Jam ka Lajong ha ka kyrdan ba saw ha ka I-League

Shillong, Kyllalyngkot 13: U rangïalehkai bynta ba shakhmat na Brazil, u Douglas Tardin, u la ïoh ban khyrwit syndon da ka hat-trick kiba u la lah ban pyndep tang hapoh 15 minit kawei hadien kawei tad haduh ka kol ba lai – kaba dei ka hat trik kaba stet tam ha kane ka samoi, haba ka Shillong Lajong FC ka la pynliem ïa ka Sporting Club Bengaluru da 5-0 kol ha ka jingïalehkai I-League ha SSA Stadium, Polo, hynne ka sngi Nyngkong.
Ka Shillong Lajong ka la ïoh ban tehlakam ïa ka jingïakhun naduh ka kylla step, kata ban lamkhmat ar kol lyngba u Daniel Goncalves (40 minit) bad na u Figo Syndai (45+2 minit) shuwa ba u Tardin (60, 67, 75 minit) un pynkhihwin da kaba thep ïa ki lai tylli ki kol ban pynthikna jingjop pyrshah ïa ka SC Bengaluru.
Kane ka dei ka jingjop kaba lai ïa ka Lajong mynta ka samoi kaba la kyntiew ïa ka sha ka kyrdan ba saw ha ka miej da kaba kamai 12 poiñ naki 8 sien ïalehkai. Kane ka dei ruh kaba saw sien lynter ïa ka Lajong ba kan ïoh ïa ka resol kaba paka khlem da shah thep (clean sheet) hala ïing. Ha kawei pat ka liang, ka SC Bengaluru, ka dang ïaineh sha traiduh jong ka miej da tang 5 poiñ na ki 8 sien ïakhun.
Ka la long ka jingïakhun kaba khluit tar bha hapdeng ki player jong baroh arliang mamla, kaba la pynlong ïa u Shantan Agrawal, uba dei u Referee ba pynïaid ïa kane ka jingïalehkai ban pynshitom ïa ar ngut ki player, ha kaba u Kynsailang Khongsit jong ka Shillong Lajong bad u Manoj Kannan ka SC Bengaluru ki la shah sei da ka yellow card tang hadien 17 minit ba ïaid ka por jong ka kylla step.
Watla ka jingïalehkai ka la long kaba khluit haduh katta katta hynrei kim shym la don bun pat ki kabu ban pynkhihjar.
Hynrei, ka Lajong ka la wanrah jingkylla ha ka minit ba 40 ha kaba u Goncalves u la thep jlang ïa ka kol lyngba ka bol pashat ba la pynbuh da u Hardy Cliff Nongbri na ka corner kick.
Shuwa ban kut ka kylla step, u Figo Syndai u la pynkhih ïa ka kol kaba ar na bynta ka Lajong kaba la ïarap pynbuh da u Phrangki Buam.
Ha ka kylla miet u Tardin u la tyngshaiñ da kaba khyrwit ïa lai tylli ki kol kiba la shimpor ïa u ban pyndep tang ha ka khyllipmat ba tang 15 minit. Ka kol kaba nyngkong ka la urlong ha ka minit kaba 60 hadien ka jingbym lah tehlakam u Kuriyama ban bat skhem ïa ka bol.
Hynñiew minit hadien, u la pynkhih ïa ka kol kaba itynnat da kaba pyndei tiak da ka khlieh ïa ka bol kaba la ïarap da u Khongsit. U Tardin u la pyndep ban kynjoh ïa ka hat-trik ha ka minit ba 75 minit kaba la pynthikna ïa ka jingjop.
Ka Lajong kan pynkhreh mynta ïa ka jingïalehkai kaba bud pyrshah ïa ka Sreenidi Deccan FC ha ka 18 tarik Kyllalyngkot ha ka por 4 shiteng nohphai sngi, shabar nala ïing, ha Deccan Arena, Hyderabad.