Khur jingjop ka Sanmer bad ka Elite XI ha ka SCA 3rd Division

Shillong, Kyllalyngkot 13: Ka Sanmer ryngkat bad ka Elite XI ki la ïoh ban khur jingjop ha ki jingïalehkai ka lympung Shillong Cricket League ha ka kyrdan Third Division jong ka Shillong Cricket Association ba la long hynne ka sngi Nyngkong ha madan Urkaliar. Ka Sanmer ka la pynliem ïa ka Youth Stars da 32 ron, katba ka Elite XI ka la pynliem da 9 wiket ïa ka Municipal CC ha ka jingïakhun kaba bud.
Ha ka jingïalehkai kaba nyngkong ka Youth Star ka la jied ban bol nyngkong hadien ba jop ïa ka toss. Haba shimti ïa ka pali tied nyngkong ka Sanmer ka la lah ba kan kamai 147 ron hapoh ka over ba la mang bad shah pynhap 9 wiket.
U Pynshgain Dkhar (51 ron naki 45 bol) bad u Donborlang Marbaniang (33 ron naki 21 bol) ki la long kiba seisoh tam ha ka tied ban kamai ron ïa la ka jong ka kynhun. Haba phai pat sha ki rangkawangbol ka liang pyrshah, u Adarsh kr Tiwari u la khur 3 wiket naki 3 over, katba u Mrinmoy Das u la khur 2 wiket naki 3 over.
Haba pyrshang beh ïa ka thong ka Youth Star ka la shah khanglad noh da tang 115 ron naba shah pynhap baroh 10 wiket hapoh ka 14.0 over, u Adarsh kr Tiwari u la kamai 38 ron naki 31 bol nangta u Kunal Goswami u la tied 19 ron naki 15 bol.
U Jhon dkhar jong ka Sanmer u la long u namtam da kaba khur haduh 4 wiket naki 3 over bad shah tied tang 24 ron naki bol jong u, kaba la ïarap ïa ka Sanmer ban jop da 32 ron bad khur syndon ïa ka khusnam ‘Player of the match’.
Haba phai pat sha ka jingïalehkai kaba ar hapdeng ka Elite XI pyrshah ïa ka Municipal CC,ïa ka toss la jop da ka Elite XI kaba la jied ban bol nyngkong.
Haba shimti ban tied nyngkong, ka Municipal ka la ïohlad ban kamai tang 91 ron naba shah pynkhyllem noh baroh 10 wiket tang ha ka 14.2 over, dei tang u Aman Bardewa uba la seisoh ha ka tied da kaba kamai 29 ron naki 30 bol.
Ka jingïaroh ka long sha u Arkadipta Chaudhary, u ba la pynlah ïa ka Elite XI ban khanglad ïa ka liang pyrshah ban kamai bun ron, ha kaba u la khur haduh 4 wiket tang naki 3.2 over kiba u la kawang bad shah tied tang 10 ron.
Ka jinglehkai bha ki nongkawangbol ka la ai mynsiem ïa ki nongtied ka Elite XI ban pyndep beh ïa ka thong tang hapoh ka 8.1 over, kata ban kamai 92 ron bad hap tang 1 wiket. Kine ki ron ki dei kiba la kamai bor bah da u Ujjal singh (39 ron naki 23 bol) bad u Shubham S Thakur (32 ron naki 16 bol), kaba la pynjop ïa ka kynhun da 9 wiket.
ïa ka nam Player of the match la khur da u Arkadipta Chaudhary u ba la tyngshaiñ ha ka bol da kaba khur haduh 4 wiket.