Leh burom ka MCA ïa u Secretary & Treasurer ba thymmai ka BCCI

0

Shillong, Kyllalyngkot 12: Ka Meghalaya Cricket Association hapoh ka jingïalam u President jong ka, u Nababrata Bhattacharjee, ka la leh burom ïa u Devajit Saikia bad u Prabhtej Singh Bhatia ha ka sngi U Blei hadien ba la pynbna ba ki la shah jied ban long Honorary Secretary bad Honorary Treasurer ba thymmai jong ka BCCI.
Ka jingïalang ba kyrpang (SGM) jong ka BCCI, ka la long ha ka sngi U Blei ha Mumbai na bynta ban pyndap ïa kitei ki ar tylli ki kyrdan kiba la thylli, hadien ba ki nongbat kam ba mynshwa, u Jay Shah u la shimti kum u Chairman jong ka International Cricket Council katba u Ashish Shelar kum u Myntri Sorkar jong ka Maharashtra.
U Saikia, uba la long kum u Joint Secretary jong ka BCCI u la shah jied khlem don nongïakhun pyrshah na bynta katei ka kam ryngkat bad u Bhatia uba dei ruh u dkhot jong ka Apex Council.
U Bhattacharjee u la ai ïa ka sopti tynrai Khasi, ka jymphong, bad ka shawl Ryndia sha uwei pa uwei. ïa kane ka jingleh burom la pdiang sngewbha bha, ha kaba u Shah u la kdew kyrpang ïa ka ha ka por ba ai jingkren.

Leave A Reply

Your email address will not be published.