Mawkyrwat, K’lyngkot 13: U Bah Pius Marwein uba dei u MLA jong ka Ranikor Constituency ha ka jingïalang ba la long ha Shnong Umpung, South West Khasi Hills District u la ïoh ban aiti ïa ka Work Order kaba T. 33/- lak tyngka na ka skhim sorkar ka Chief Minister Special Development Fund (CMSDF) jong u snem 2024-’25 sha ka Umpung Athletics Sports & Cultural Club (UAS&CC).
Kane ka jingai jingïarap ka long kum shibynta ban pynbha ïa ka Madan ïalehkai kynjatbol ha kane ka shnong Umpung bad ngeit skhem kane ka long shisha ka jingkyrkhu kaba khraw ïa ki khun samla khamtam ba kane ka shnong Umpung ka la ju pynmih ruh bun ki samla kiba don ïa ka sap ha ki kam ïalehkai bapher bapher la ha ki kam ïa jngi-um ne ïalehkai kynjatbol kiba la paw ym tang hapoh ka South West Khasi Hills District hynrei ha ka jylla Meghalaya baroh kawei.
U bah Bookingstar Khardewsaw bad bah Straining Kharwanniang kiba dei ki nongkitkam jong ka Umpung Athletics Sports and Cultural Club ha ka jingkren jong ki, ki la pynpaw ka jingsngewkmen kaba khraw namar ba hadien da ki 25 snem kim shem pat la ïoh kano kano ka jingïarap na ka sorkar ne na ki nongmihkhmat na kane ka thaiñ watla ki la pyrshang shibun ki jingkyrpad ban pynïoh jingïarap ïa ka madan ïalehkai kynjatbol hynrei dei tang ha kane ka kynti ba mynta na ka jinglong MLA jong u bah Pius Marweiñ ha kaba kum ka club ka la ïoh ïa kane ka jingangnud jong ki samla jong ka shnong.
Kumta ki kyrmen skhem ba lyngba kane kan long shisha ka jingsah jingkynmaw ïa ka shnong bad nangne sha khmat kin nang lah ban kyntiew ne pyntyllung ïa ki kam ïalehkai hapoh ka shnong ka thaw.
Ïa kane ka jingïalang ba lyngkot la pynlong ha Dorbar Hall Umpung ba la pynïaid da u Bah Wallet Khardewsaw Myntri shnong ha ryngkat da ka jingïasakhie lang ki paidbah jong ka shnong.
