Ryngkat u MDC pynkup burom ka Laitkor Dorbar Pyllun ïa ki thei phutbol ka Laitkor SC

Shillong, Kyllalyngkot 13: Ka Laitkor Dorbar Pyllun ha ryngkat u Bah Lambor Malngiang, MDC ka Nongkrem, ha ka 13 tarik u Kyllalyngkot, 2025, ki la pynkup-burom ïa ka kynhun ki thei ïalehkai jong ka, kaba la ïoh ban rah ïa ka nam lahduh jong ka lympung ïalehkai phutbol ba la tip kum ka Women’s Football League Tournament 2024 ba la pynlong da ka Shillong Sports Association ha madan Polo.
Ha kane ka jingïalang nalor u Bah Lambor Malngiang uba ju noh synñiang shibun ban ïarap ïa ka Laitkor Sports and Cultural Club kum u kongsan la ïa donlang u Pa’iem Ainam Manik Syiem, Syiem ka Hima Mylliem, ki nongïalam ka Club, ki nongshong shnong, ki thei ïalehkai lem ki kmie ki kpa.
Kum ban shu kdew ba ka Laitkor Sports Club Women’s Football Team ka la pynliem ia ka Pay For Right Football Academy da 2 kol la 0 ha ka phainal jong ka lympung kaba la pynlong ha madan 1st Ground, Polo myn ha ka 30 tarik u Nohprah, 2024.
Na ka liang u MDC kum ka dak ka jingsngewkmen bad jingsngewsarong u la noh synniang da ka khusnam pisa sha iwei iwei i dkhot ka kynhun ha ryngkat ki jingai sngewbha.
Haba kren ha ka jingïalang, u Bah Lambor u la pynpaw ba ki khun samla ki hap ban long kiba la khreh ban ïakhun pyrshah ia kiba bun ki jingeh ha ka jingïaid lynti jong ka jingim bad kino kino ki kam kiba ki leh ne trei.
U la bynrap ban poi sha ka thong ka jingjop donkam ka jingskhem jingmut bad ka jingtrei minot.