Ryngkat ka kyntu ban kiar na u drok sdang ka KSU ïaka Maitshaphrang Cup ha Umsning

0

Nongpoh, K’Lyngkot 13: Kum kawei naki thong ban ai mynsiem ïaki khun samla ban kilan met bad kiar naki jingmlien bad ki jingdih ba sniew khamtam u drok u ba la kynrei ha man la ki jaka ha kylleng ka jylla, ka KSU Umsning Circle mynta ka sngi kala sdang ïaka Maitshaphrang Cup 2025 halor ka thong ‘Ong em ïa u drok’ ha madan USCC ha Umsning.
Ïa katei ka lympung ïalehkai la wan ban plie pyrda da u Samla Eric Nongkynrih Sports and Cultural Secretary ka KSU CEC kum u kongsan lem bad u samla Johny Nongrum Sports and Cultural Secretary ka KSU North Khasi Hills District Unit, haka jingdonlang ki nongïalam ka KSU Umsning Circle bad kiwei kiwei ki riew rangbah naka thaiñ Umsning.
Ka jingïalehkai plie pyrda ha katei ka sngi kala long hapdeng ka Nangkiew Irat SC pyrshah ïaka Mawlai Impact ha kaba ka jingïakhun ka long kaba ïakhaid bad itynnad bad naduh ba sdang ka kylla step haduh ba kut ka kylla miet ym shym don ba ioh pynkhih ïaka jar ha kaba ki bor pynïaid kila rai ban pynshut noh da ka tie-breaker bad dei haka jingïashut tie-breaker ka Nangkiew Irat SC kala lah ban pynliem noh ïaka Mawlai Impact da 5-4 kol ban ioh mad ïaka nam jop ba nyngkong katei ka lympung.
Naka liang u kongsan haba kren ha katei ka sngi u la ai ka jingïaroh ïaka KSU Umsning Circle kaba la shim ïa katei ka sienjam ban pynlong da ka phutbol da ka jingangnud ban long ka nuksa bad ban ai mynsiem ïaki khun samla ha kane ka juk ba mynta ba kim dei ban pynlut por haki kam kai bad ki jingmlien ba sniew naduh ka kyiad, u drok bad kiwei kiwei ki jingdih buaid hynrei ban long ki samla kiba don ka jingkitkhlieh ïaka jaitbynriew namar u drok mynta u la long kum u nem sniew ban pyntroiñ ïaki khun samla haka jylla.
U la ïathuh ruh ba kila don bun ki samla kiba la kylla ba mut khamtam haba pynkynmaw ba uwei u samla ha nongbah Shillong u dei u ba la kyrni ha u drok dang haka rta kaba dang khynnah hynrei da ka jingkut jingmut hadien ba u la shah sumar haki jaka ai jingsumar ïa kiba kyrni drok, utei u samla mynta u la lah ban bthat ïa u kynjri bad long ruh uwei naki samla ba kilan met haka jinglehkai MMA bad long ruh uwei naki nuksa ïa kiba bun naki samla ha kane ka juk mynta ba kim dei ban tlot ka jingmut jingpyrkhat bad ngop haki jingshah pynshoi hynrei ban skhem ka nongrim bad ban don ka thong haka jingim.
Naka liang ki nongïalam ka KSU Umsning Circle kila pynpaw ruh ba ki don ka jingangnud ban thied ambulance naka pisa ba mih na katei ka lympung ban ai ka jingshakri sha ki paidbah haka thaiñ Umsning bad kumjuh haka them Ri-Bhoi hi baroh kawei.
Kum ban shu pynpaw ba ka khusnam baroh jong katei ka lympung kan long 8 lakh, kata 5 lakh ïa ka kynhun kaba jop bad 2 lakh ïaka kynhun kaba rem nalor kiwei kiwei ki khusnam shimet kaba dei kawei naki jingïakhun kaba heh haka them Ri-Bhoi.

Leave A Reply

Your email address will not be published.