Nongpoh, Risaw 30 : Da ki spah ngut ki nongkyrshan bad kumjuh ki nongïalam bad nongkitkam ba hakhmat ka party UDP bad Congress ha Umroi Constituency haka sngi Saitjaiñ kila mih noh naki party ba ki don ban leit pynïasoh pat bad ka party NPP naka bynta ban kyrshan ïa u kyrtong ka party NPP u Bah Damanbait Lamare u ba dei u khun jong u Ngaitlang Dhar MLA barim ka Umroi, ban pynjop donburom ha kane ka elekshon ban wan.
Ki nongïalam na kiwei ki party kiba la leit ban pynïasoh ha katei ka sngi ki kynthup ïa u Bah Ailong Manbha Pariat u ba dei u General Secretary ka UDP Youth Wing ha Ri- Bhoi bad ha Umroi Block, u Bah Pynskhemborlang Sun Joint Secretary ka UDP Ri-Bhoi, u Bah Ailad Shadap Working President Umroi Block Youth Congress, Bah Sen Thabah Ex President ka BJP ha Ri Bhoi bad kiwei kiwei ryngkat ki paidbah nongkyrshan bala pdiang burom da u Ma Ngaitlang Dhar President ka NPP ha Umroi Constituency, haka jingdonlang u Bah Dasakhiatbha Lamare MLA ka Mawhati, u Bah Damanbait Lamare kyrtong ka NPP ha Umroi, u Bah Pynhun Rynghang General Secretary ka NPYF haka jylla, bad kiwei kiwei ki riew rangbah.
Kitei ki nongïalam na kiwei ki party kiba la leit ban pynïasoh NPP kila pynpaw baka party NPP ka don ka jingkyrmen ha Umroi Constituency kumba long haduh mynta namar ka party NPP ka dang dei ruh kaba khlaiñ haka jylla bad khlem pep, lyngba ka jingtrei shitom jong ki bad ki nongkyrshan ki pynjop ïa u Bah Damanbait ha kane ka elekshon ban wan na Umroi Constiteuncy.
U Bah Ailong Manbha Pariat kum uwei naki nongïalam bad nongkitkam ba shitrhem jong ka party UDP naduh ki por ba mynshuwa u la pynpaw ba daw ba u mih noh naka party UDP ka dei namar ba haduh mynta katei ka party kam don kyrtong ha Umroi, bad kumba la jia ha ka elekshon bala dep u kyrtong katei ka party u la shah rem noh bad khlem pep katei kan dang jia haka elekshon ban wan, dei namar katei ka daw ba um banse ban mih noh ban leit kyrshan pat ïaka party NPP kaba don ka jingkyrmen ban rah ïaka nam jop na Umroi Constiteuncy, u la bynrap.
Naka liang u Ma Ngaitlang Dhar haba kren ha katei ka sngi u la pynpaw ka jingsngewkmen kaba khraw halor ka jingwan pynïasoh jong kitei ki nongïalam khamtam kiba dang samla rangbah kiba don ka jingpyrkhat jngai bad iohi jngai ba ka party NPP ka don ka jingkyrmen ha Umroi Constituency bad katei ka jingpdiang ha katei ka sngi ka dei tang ïaki nongïalam ba hakhmat eh, bad tang kiba la wan ban pynïasoh thymmai haduh mynta kim duna shuh ïaka 2 hajar ngut.
Lyngba katei ka jingwan pynïasoh jong kitei ki nongïalam na kiwei ki party, ka dang pynkhlaiñ ïaka party bad nang ai mynsiem shuh shuh ba kum ki nongtrei jong ka party kin dang trei shitom naka bynta ban pynjop donburom ïa u kyrtong ha kane ka elekshon ban wan, la bynrap u Ma Ngaitlang.
