Da ka ambulance ai u Bah Prestone ban pynsuk ïa ki nong Pynursla ba sah ha Shillong

0

Shillong, Risaw 30 : U Symbud Myntri Rangbah ka Jylla, Bah Prestone Tynsong ha ka sngi Saitjaiñ u la pyllait paidbah ïa ka kali kit nongpang kyrpang na ka bynta ki nongshong shnong ka Pynursla constituency kiba shong ba sah ha Shillong.
Ha shwa ban pyllait ïa katei ka ambulance bad aiti pat sha ka NPP unit kaba don ha Shillong, u Bah Prestone u la pyntip ruh ba ki paidbah ka thain riwar mynta ki la don ar tylli ki ambulance, kata kawei ha Pynursla bad kawei pat ha Shillong.
U ong ruh ba ka jingïoh ban pyllait paidbah ïa katei ka kali kit nongpang kadei lyngba ka jingtrei borbah jong ka unit kaba don ha Shillong ban ai ka jingshakri ïa ki paidbah ka thaiñ riwar baroh kiba ïa tyngkhuh ïa ki jingjia la ka long ha ka pang ka shitom bad ruh ha ka ïap ka im.
“Nga ai ïa kane ba kan long ka jingshakri ïa ki paidbah ka thain riwar baroh kawei khnang ba kan long ka jingkyrkhu ïa ki nongshong shnong ka thaiñ baroh kawei. Mynta ngi don kawei ha Pynursla bad kawei ha Shillong bad kumta nga kyrmen ba ngin lah ban ai ka jingshakri bad ka jingmyntoi kaba kham paka ïa ki nongshong baroh,” u la bynrap biang.
Ha kane ka jingïalang la donlang ruh naduh u nongai ktien ka NPYF, Bah Bajop Pyngrope nangta u Secretary ka NPP East Khasi Hills Bah Aibor Tynsong nalor ki nongkitkam jong ka NPP Pynursla – Shillong Unit.

Leave A Reply

Your email address will not be published.