Ym da ka ‘Ordinance’ hynrei pynduh syndon ïa ka Gaming Act & Gaming Rules : MLA Nongkrem

0

Shillong, Risaw, 30: U MLA bad MDC jong ka Nongkrem Constituency u Bah Lambor Malngiang u la ong ba dei ban pynduh shisyndon ïa ka Meghalaya Regulation of Gaming Act, 2021 kumjuh ïa ka Meghalaya Regulation of Gaming Rules, 2021 namarba ka Ordinance kan shu pynïap shipor ïa ki aiñ bad kin sa treikam biang pat kumjuh hadien hynriew bnai.
Haba pynpaw ba u ladep rah ïa kane ka mat ha Iingdorbar Thawaiñ ka Jylla Meghalaya ha u Nailur mynta u snem, u Bah Malngiang u la ong, “ka jingrah ïa ka Zero Hour Notice ka long ban pynpaw ïa ka jingbym-hun, ka jingbym-sngewtynnad bad ka jingbym-pdiang da ki kynhun bapher bapher khamtam ki nongïalam kynhun Balang ïa ka jingbuh ktem khalai ne Casino ha ka Jylla.”
U la ong, hadien ba la ïakren ha Iingdorbar Thawaiñ, na ka liang jong u ruh u la phah da ka jingthoh bad ïakynduh ïa u Myntri Rangbah ka Jylla u Conrad K. Sangma ban ïakren halor kane ka phang bad u Myntri Rangbah ai ka jingkular ba un sa leh ïa kaba donkam.
Halor ka jingkren u Myntri Rangbah dang shen pat ban wanrah da ka Ordinance ha ka jingïalang Kynhun Myntri, u Bah Malngiang u la buh jingkylli pat ba ka Ordinance ba kumno yn wanrah la ka dei ïa ka Gaming ne ïa ka Gaming Rules. U la ong ba ka pynklumar jingmut bad bynrap ba ma u hi u la kren da kaba shai ba la shu pynrung na lyndet ha kaba ïa dei bad ki Casino
“Ka long ka jinglehraiñ namarba ha ka Jylla Meghalaya kaba don bun ki nongshong shnong ki dei ki Khristan bad ngim lah ban ïalehkai ïa kata’, u la ong da kaba buh jingkylli ïa ka Sorkar ba ka dei ban shai ba kane ka Ordinance kan dei ïa ka Gaming Act lane ïa ka Gaming Rules.
U la ong ba na ka liang jong u hi u dawa ba dei ban pynduh beit bad ym donkam ïakren da kumwei pat. “Ai ba ka long ka man kan ïaid kumba ïaid mynshwa bad kan sah kumto bad ym dei ban ktah”, u la ong da kaba kynthoh ba ka jingong ba kin ïarap pynmih pisa sha ka Jylla ka long kaba ym lah ban pdiang.
“Ka jingthmu ka long ban pynrung ïa ka Casino kumta sa mih kine ki Act ne ki Rules. Na ka liang jong nga hi nga ong pynduh beit namar ka Ordinance hi ka treikam tang hynriew bnai”, u la ong da kaba buh jingkylli ïa ka Sorkar ba hato hadien hynriew bnai yn ïa shna biang ïa ki Casino?

Leave A Reply

Your email address will not be published.