Pyndep 104 ngut ki pulit UB ïaka jinghikai na APTC 6th Bn Umran, pynkup burom ka DGP

0

Nongpoh, Naitung 09: Ka Kong Idashisha Nongrang, Director General of Police ka jylla mynta ka sngi kala hiar sha Umran ban pynkup burom ïa 104 ngut ki pulit langrut (Unarmed Branch) bad 7 ngut ki nongbud (Follower) kiba la pyndep ïaka jinghikai ba sdang (Basic Training) jong ka 4th Batch Passing Out Parade jong ki Unarmed Branch Recruit Constables bala pynlong ha Armed Police Training Centre jong ka 6th Battalion kaba don ha Umran, Ri-Bhoi District.
Ha katei ka sngi la sakhi ruh da ka jingdonlang u Ritu Raj Ravi Commandant ka 6th MLP Battalion, APTC Umran, ki heh pulit naka jylla lem bad ki bahaiing hasem jong kitei ki pulit bala pyndep jinghikai.
Ha katei ka sngi naka liang kitei ki pulit ophisar kiba la pyndep ïaki jinghikai kila shim bynta ruh ïa ka parade ha kaba ka DGP kum ka kongsan ka la shim ïaka salute. Haba kren ha katei ka sngi naka liang ka kong I Nongrang haba kren ha katei ka sngi, kala pynpaw ïaka jingsngew sarong bad ai khublei ïa baroh kitei ki pulit kiba la pyndep hok ïaka jinghikai kiba la rung bad long kum ki dkhot thymmai haka longiing jong ki pulit ka jylla Meghalaya.
Kala ai ruh ka jingkhublei ba kyrpang ïaka Armed Police Training Centre bad baroh ki nonghikai kiba don bynta ban trei shitom bad aiti lut met bad mynsiem, haduh ba kitei ki pulit UB kila dep pura bad pyndep ïaka jinghikai.
Naka liang ka kong I Nongrang kala ai ruh ka jingïaroh kaba khraw ïa kitei ki pulit langrut ha kane ka sien ba mynta namar ki don ruh ki samla kiba la pyndep ïaki jingpule kiba kham shalor naduh Graduate, Post Graduate bad kane ka long ka jingsarong kaba khraw ban nang pynjanai ïaka rukom treikam ki pulit namar haki por ba mynshuwa ki kham duna ki samla kiba la pass ïaki kyrdan ba kham shalor ba kin thep ïa kitei ki post.
Naka liang ka DGP I Nongrang ka la kyntu ruh ïa kitei ki nongtrei thymmai jong ka tnad pulit ba kin bat ïa ki kyndon, ban shakri da ka akor ka burom haka kam bala bynshet haki bad khmih lynti ruh ba kin ai ka shakri hok haka tnad pulit jong ka jylla haki sngi ban wan.

Leave A Reply

Your email address will not be published.