Ha ka jingiphuh iphieng la rakhe ïa ka jingdap 9 snem kynthih ka jingiaid lynti ka JNC

Khliehriat naitung 10: Ha ka rukom kaba iphuh iphieng bha ka Jaiñtia National Council mynta ka sngi ka 10 tarik u naitung 2024, ka la rakhe ïa ka jingdap khyndai snem kynthih ka jingiaid lynti jong ka seng ha ka jingshakri ïa ka ri bad ka jaitbynriew bad ïa ka bha ka miat ha ka imlang ka sahlang, ïa ka prokram la pynlong ha Khliehriat West Community Hall.
Ha kane ka sngi u bah Bisharbha Pala, u la long kum u kongsan uba la phah da ka MLA jong ka Sutnga-Saipung ka kong Santa Mary Shylla bad u la pyllait paidbah ruh ïa ka jingrwai jong ka seng ba la ai kyrteng “Ri Jaiñtia ’ ba la rwai bad pynbit pynbiang da u bah Sambormi Lyngdoh uba dei u President ka JNC, u Secretary, u bah Wanshwa Suting lem bad ki dkhot.
U President jong ka JNC u bah Sambormi Lyngdoh u la kren halor ki lai tylli ki nongrim ba ka seng ka ieng, ka Tip-briew, ka tip Blei, ka Tip kur tip kha bad ka kamai ïa ka hok u la ong ruh ba kine ki ieng kum ki lai tylli ki mawbynna.
Haba kren kum u kongsan u bah B.Pala, u la ai ka jingkhublei kitbok kitrwiang ïa ka seng Jaiñtia National Council kaba la kynjoh sha ka khyndai snem ha ka jingiaid lynti jong ka bad u la ai mynsiem bad pynshlur shuh shuh ba kum ka seng kam dei ban kynran dien haba kynduh kino kino ki jingeh hynrei dei ban iaid shakhmat ban ieng na ka bynta ka bha ka miat jong ka ri bad ka jaitbynriew “Khmihlynti ba lyngba kane ka seng JNC kan iai im ka ri Jaiñtia kan im ruh ka ri bad ka jaitbynriew” ong u kongsan.
U President rangbah ka JNC, u bah Sambormi Lyngdoh ha kane ka sngi u la kren ruh shibun kiei kiei kiba u la mad ha ka jingiaid lynti jong u kum u nongïalam ha kajuh ka por u President ka JNC u la ai mynsiem bad pynshlur ruh ïa ki nongïalam bad ki dkhot ba kim dei ban kynran dien wat lada wan ban beh ka lyerbah lyer san lane kino kino ki jingpynthame u la bynrap shuh shuh ruh da kaba ong “Ngi ngim ju don kata ka jingsngewpher jaitbynriew namar ha ka por ba iakhih them motor ruh ngi nangne da ki spah tylli ki kali ngi la leit bad iashimbynta lang ha ka jingiakhih bad ruh ka nongrim jong ngi kum ka seng ka long ruh ban pynneh pynsah ïa ki matti u longshwa kiba u la buh ha ngi ki longdien bad kawei ka dei ka jingkheiñ kur kaba teh song ïa ka jaitbynriew, lada ngi pynduh jait ïa kane ka jingtip kur tip kha jong ngi kynmaw ba ka jingiatylli kum ka jaitbynriew kan sa duh noh, ka jaitbynriew ka bym don ïa ka dustur ka dei ka jaitbynriew kaba iap te kumta hashwa ba kane ka lyer kanbeh ngi dei ban shna ïa ka kynroh kaba shkem bad ba khlaiñ kum ki shipai jong ka ri ban ïada na kane ka lyer kaba la pyrshang ban tur hangne ha ka ri bad ka jaitbynriew ka jongngi ban peit bishar bha ïa ki briew kiba kwah ban pynkylla ïa ki riri ki dustur ha ka shongkha shongman, ha ka tipkha tip kur”
U la ong ruh ba haduh mynta ym pat don ki aiñ ki dustur ki ban ïada kumta ka jingshah klun ki jaka ki puta ka dei namar ka jingtlot ki district council “sngewsih ruh ba kiba bun ki MDC ha ri lum Jaiñtia ki dei tang ki nongbud jong ki MLA, ki nongbam tulop hynrei kim tip pat ban shna ïa ki aiñ ban iada ïa ka khyndew ka shyiap” bynrap u nongïalam ka JNC.
Utei u nongialam u kren ruh da kaba sngewkhia halor ka jingkiew ka jingbamsap u la ong ruh ba sngewkmen pat ba kiba bun ki la sngewthuh ban wanrah noh ïa ka jingkylla ban wanrah noh ïa ka jingsynshar kaba khuid ba suba.
Ki nongïalam sengbhalang kiba la ai jingkren ki kynthup ruh u President jong ka Jaiñtia Students Union, u bah Jersom Shylla, u President jong ka Jaiñtia Students Movement, u bah Leningstar Rymbai, kiba la ai ka jingkitbok kitrwiang ïa ka Jaintia National Council kaba la kynjoh sha ka khyndai snem kynthih ha ka jingiaid lynti jong ka kum ka seng, ki la ai mynsiem bad pynshlur shuh shuh ïa ki nongïalam bad ki dkhot ba kin nang lah shuh shuh ban trei ban ai shuh shuh ka jingshakri kaba paka ïa ka ri bad ka jaitbynriew.
U bah Jersom Shylla u la ong ba ka JNC ba la lam khmat da u bah Sambormi Lyngdoh ka dei ka seng kaba khlaiñ bha ha Jaiñtia khamtam ha East Jaiñtia Hills District, ka seng kaba ieng ha ka nongrim bad ki don ki mat kiba ka JSU ruh ka ju ai ka jingiatreilang bad ka JNC, u la kren ruh halor ka jingdonkam ban ioh ïa ka Inner Line Permit, ka jingshim khia bha ban ieng ban iada ïa ka khyndew ka shyiap bad ruh ban khanglad ïa ki briew kiba na bar kiba mut ban wan knieh ïa ki kam ki jam jong ki trai jylla trai muluk.
U bah Leningstar Rymbai, u kyntu ïa ki dkhot sengbhalang ba kim dei ban shim kabu ïa kano kano ka jingmyntoi shimet ha ka kyrteng jong ka seng, hynrei ban shim ïa ka lyngkor ban shakri ïa ka ri bad ka jaitbynriew “Kum ki nongïalam sengbhalang shisha ngi mad shibun ki jingeh, ki jingialeh, ngi mad ruh ïa ka thma man ka por namar kiwei pat ki jaitbynriew ki kwah ban wan shong rieh ha kane ka ri baieid jong ngi” ong u bah L.Rymbai.
Kiba la ai jingkren ki kynthup ruh u Muktiar na ri lum Jaiñtia, u bah Kerlang Ksoo, u Waheh Shnong Wapungshnong, u bah Kduplang Ryngkhlem, i kong Jhanika Siangshai bad kiwei kiwei, la pynbyrng ruh da ka jingshad tynrai na ka ki samla kiba na Jalaphet ba la pynbit pybiang da ka JNC-Jalaphet Circle bad ïa ka prokram la pyniaid da u bah Mehi Rymbai, uba dei u Art and Culture Secretary JNC.