Shillong, Jylliew 25: Ka Khasi Students Union (KSU) ha ka sngi Saitjaiñ ka la pynbna da ka thma pyrshah ïa u drok ryngkat ka jingkyntu ïa ka Sorkar Jylla ban shim da ki buit ba thymmai na bynta ban ïakhun pyrshah ïa ka jingkynrei une u jyndih pynbuaid kaba wanrah ruh ïa ka jingjot ym tang ïa ki ïing ki sem hynrei ïa ka imlang sahlang jong ka jylla.
Haba kren ha ka jingïalang pynskhem ïa ka Central Excutive Council (CEC) ba thymmai ka KSU, u President ka seng u Bah Lambokstar Marngar u la pynbna “Ngi la rai ban pynlong noh da ka thma pyrshah ïa u drok da kaba ïatreilang bad ki Dorbar Shnong, ki seng samla shnong, ki seng kynthei, ki skul bad ruh ryngkat bad ki briew jong ka aiñ”.
Haba kren halo ka jingdonkam ban shim da ki buit ba thymmai ban rat dyngkhong ïa u drok u Bah Lambok u la ong, “Ngi dawa ba ka Sorkar Jylla ban shim da ki buit thymmai ban tehlakam ïa kane ka jingeh khnang ban lah rat dyngkhong naduh tynrai ïa ka jingdie bad jingdih droks ha ka imlang sahlang namar haba kynrei une u jingsniew ym tang ïa u ba kyrni bad ka ïing ka sem ne ka imlang sahlang kaba shah pynjot hynrei ka jaidbynriew hi baroh kawei”.
Hadien kane, haba ïakren bad ki nongthoh khubor, u Bah Lambok ula ong ba ka jingdie bad jingdih droks ka dei ka jingma ïa ka lawei jong ki samla jong ka jaidbynriew bad ka jylla baroh kawei.
“Ka jingwan rung u droks hapoh ka Jylla ka dei ka jinghiar thma ba jar jar ïa ka Jaidbynriew jong ngi da kaba pyntroin ïa ka lawei jong ngi ki samla bad ngi ïohi ba kiba bun hi ki jingkem drok ka dei beit na ki thaiñ Madanrting bad Them Basuk da ki briew bym dei na ka jaidbynriew jong ngi,” u la ong.
“Namarkata, ngin ïatreilang bad ki Dorbar Shnong ban rat dyngkhong ïa ka jingdie bad jingdih drok. Ngim dei ban ibeiñ ïa ki nongdih drok bad ban kheiñ ïa ki kum ki nongleh kam sniew hynrei ngi dei ban peit ïa ki kum kiba pang bad kiba donkam ïa ka jingai kti lem jong ngi ban lait na kane ka jingkyrni”, u la ong,
Haba kylli, une u Nongïalam ka KSU ula ong ba kala donkam ban don ka mon jong ka Sorkar Jylla ban wanrah ïa ki sienjam ba thymmai ha kaban ïada ki briew uniform (Pulit) ba kin don ka jingïadei bad ki nongkhaïi droks.
“Ha ki snem bala leit noh, ngi la shem ba ki Pulit kila ïadonkti lang ha ka jingkhaïi droks hynrei ngim ong ba baroh na ki ki long kumjuh. Hynrei ka Sorkar kan hap ban khmih bha ïa kane khnang ba kan nym phah ïa ki nongtuh ba kin kem ïa ki nongtuh” ula bynrap.
U Bah Lambok ula ban jur ruh ïa ka jingdonkam ïa ka Sorkar ban wanrah ïa ka Cell la ka jong ban set ïa ki nongdih droks kiba shah kem haba ong “Kane ka cell ka dei ban don ïa ki councelling centre ki ban ïarap ïa ki briew bala kyrni ba kin lait noh na une u jingdih”.
“Ngi lyngngoh ruh ban tip ba wat hadien bun phew snem ba u drok u la wan ban hiar thma jarjar ïa ka jaidbynriew ka sorkar jylla kam shym la shim kino kino ki sienjam bad buh ïa ki Rehabilitation center ban ïarap ïa kito kiba la kyrni ban kylla bamut,” u la bynrap.
