MFA Artificial Turf Football Ground-Polo, Jylliew 26: Ka lympung ïalehkai jong ka Subroto Mukherjee Cup jong ki skul ba la pynïaid da ka Ophis District Sport Officer East Khasi Hill la ïoh ban plie pyrda hynnin ka Lah Sngi U Blei ha madan lehkai MFA Artificial Turf Football Ground-Polo bad ha madan Heh Mawlai-Phudmuri.
Ha kane ka lympung la phiah ha ar tylli ki kyrdan ïalehkai, kiba kynthup ïa ka Under-17 bad ka Under-14 jong ki khynnah shynrang.
Haba phai sha ka jingïalehkai jong ka Under-17 kaba la pynlong ha madan 3rd Ground-Polo, ka kynhun jong ki rangïalehkai ka skul ïewrynghep Sec. School ka la mad ïa ka namrem hakhmat ka Shillong College H.S. Education da 2-0 kol.
Haba bishar ïa ka jingïalehkai, lah ban kdew ba ka kynhun ki rang Under-17 ka Shillong College H.S. Education ka la kham lah shibun ban tehlakam ïa ka bol kaba la sdang ban ñion naduh kaba sdang bad kam shym la pynsep-ei ïa ki kabu ba ka la ïoh ban khylliap ïa kane ka jingïakhun da ka namjop.
Haba phai pat sha ka jingïalehkai kaba la pynlong ha Madan Heh, ki khynnah ïalehkai Under 14 jong ka skul ïewrynghep Sec. School ki la ïoh ban sdang ïa ka lympung da ka namjop kaba suk ïa ka Rynli U.P. School da kaba thep kput haduh 5-0 kol.
Ka ïewrynghep Sec. School, kata ka U-14 kin sa ïakhun biang ha ka 28 tarik, bad ka jaka kan long ha Madan Heh-Mawlai pyrshah ïa ka OM Roy H.S. School.
