Pynursla, Jylliew 25: Tang hadien shibnai tam ba ka jingjia ba pynpar ñiang khriart ïa baroh namar ka jingsiat ïap jong ki BSFïa u Bah Roningstar Nongkynrih kaba la jia harum ka shnong Mawshun, Pynursla ha ka janmiet sngi u Blei uwei u samla ïa uba la tip kyrteng kum u samla Jeffry Podweiñ 26 snem ka rta na ka shnong Erbamon kaba don harum Pynursla u la mynsaw jur na ka jingshah bom ha ki BSF ha jan ka shnong Umsyiem.
Haba u Mawphor u la ïoh ban ïakren bad u Rangbah shnong ka Umsyiem kaba kane ka jaka ba la jia ka jingshah shoh ka hap hapoh ka jylli synshar jong u u Bah SL Kongwang u la ïathuh ba kane ka jia ha ka por 9 baje eiei. Haba kylli ïa ka daw u Bah SL Kongwang u la ïathuh ba ka jingjia ka dei beit namar ka jingleh riew khlaw jong kine ki BSF.
“Dei ha ka por 9 baje eiei ha kaba ka don kawei ka kali kaba mih na shnong jong ngi ban leit sha Dawki hynrei ynda la poi ha ka jaka ba don ka ktem kine ki BSF kane ka kali ka la sniew noh bad ki BSF ba don ha kane ka jaka ki hiar ban bat da ka jingkynnoh ba ki dei kiba kit ïa ki mar ban leit shalan be-aiñ sha Bangladesh bad tang hadien katto katne por la wan poi sa kawei pat ka kali kaba mih na ka shnong jong ngi hi bad haba la ïohi ba ka kali u para shnong ka sniew ki sahngeh bad ïarap hynrei mar kumta napdeng kine ki BSF la don uwei ba la shoh khawiang u la jrong kti ïa kine ki samla na ka shnong jong ngi,” u la ïathuh.
“Une u samla uba shah shoh ruh um dei uba don lang ha katei ka kali hynrei uba shong ha jan katei ka ktem ki BSF ban lehkai Mobile namar ka jingbym long ka internet ha ka shnong jong u bad kine ki BSF khlem tip ïa ka dang ka duh ki la shuh tied napahng beit bad ki don sanngut kiba la mynsaw hynrei dei u Samla Jeffry uba la kham mynsaw jur namar u la shah tied na ki bynta jong ka khlieh,” u la bynrap,
U la ïathuh ruh ba na ka liang ki paidbah marsyn ïoh jingtip ïa kane ki la hiar marmar bad u la ïathuh ba ka don ka jingïapynibor hapdeng ki paidbah bad ki BSF.
U la ïathuh ba namar kiba ha iing kim kwah ban shah ïalam leit sumar ha ki BSF kat haduh ban thoh ïa kane ka khubor une u samla ba sha shoh u dang don ha katei ka jaka. “Ka don ka jingther maw na u paidbah bad ka don ruh ka jingsiat kuli ba la bun suloi da ki BSF sha suiñ bad na ka liang ki heh ka BSF mar kumta ki la wan poi ban teh lakam ïa kane ka jingjia,” u la ïathuh.
U la ïathuh ba na ka liang ki paidbah ki la ju mad man ka por ïa kane ka jingshah pyndik ha ki BSF.“Na ka liang ki BSF ki kular ban sospon ïa une u BSF hynrei na ka liang jong ngi ngim pdiang ban shimti tohkit da ki BSF ngi kwah ba ki pulit ka sorkar jylla,” u la ong.
U la ïathuh ba na ka liang ka shnong ka daw ba dei ban siew bai lutksan ïa ka bai sumar jong une u samla bad ruh ban sospon ïa une uba donkti. Kat haduh ban da thoh ïa kane ka khubor na ka liang ki paidbah ki dang ïalum beit ha katei ka jaka hynrei namar ka jingdon ki BSF ba sngewthuh ïakren kam shym la jia shuh kano kano ka jingïapyni bor.
