Pynbna ‘Squash Mission’ noh ïa ka kam rep Biskot ha West Khasi Hills, ong u Bah Gabriel Wahlang

Nongstoiñ, Lber, 21: Ha ka sien ieng ba nyngkong eh kum u MLA ba don burom jong ka Nongstoiñ hapoh ka Meghalaya Assembly, u Bah Gabriel Wahlang u la ban jur ïa ka sorkar Jylla ba thymmai, ba kan shimkhia halor kiba bun ki mat kiba kongsan kiba ïa dei bad ka Nongstoiñ Constituency bad ka West Khasi Hills District baroh kawei.
Haba ai jingkren u Bah Gabriel Wahlang u la ban nyngkong eh ha kaba ïadei bad ka kam rep kam riang lane Agriculture, ïa kaba ki nongrep jong ka West Khasi Hills hi baroh kawei ka donkam palat ïa ki lad jingïarap, namar kham bun hi ruh ki nongshong shnong ki dei kiba rep bad ri jingri.
U Bah Gabriel u la kyntu sha ka sorkar MDA 2 ba kan shimkhia noh ha ka jingïadei bad ka rep biskot, kaba dei kawei na ki kam rep kaba kongsan bha ban kyntu ïa ka kamai kajih ha Eastern bad West Khasi Hills. U la ong ba ka por ka la biang eh ba ka sorkar kan don noh da ka ‘mission’ halor ka kam thung biskot lyngba ka tnad Agriculture ha kine ki ar District.
Ha kaba ïa dei bad ka kam bording, u la pynpaw halor ka shnong Domsaw bad kiwei ruh ki shnong kiba hap ha ka Saubhagya Scheme, ha kaba ïa ki meter lait ha ki ïing briew la dep ban buh hynrei ym pat treikam ei ei haduh mynta la palar 3 snem. U la kyntu ba ka sorkar ka dei ban shimkhia halor kane ka bynta na ka bynta ka jingmyntoi ki paidbah nongshong shnong.
U la pynkynmaw ruh ba hadien ka jingphiah ïa ka Eastern West Khasi Hills na ka West Khasi Hills, ki la don kumba 48 tylli ei ei ki shnong kiba hap hapoh ka Mawthadraishan C&RD Block, kiba hadien ba la pynkynriah sha Nongstoiñ C&RD Block, ki la duh noh ïa ki jingpyntreikam ïa ki skhim khamtam ka skhim MGNREGS. Kumta u la kyntu ïa ka sorkar ba kan shim ïa ki sien jam kiba biang eh ba kine ki shnong kin ïoh pat ïa ka bhah lane ki lad jingïarap kumba ki dei ban ïoh.
Ha kaba ïa dei bad ka pule puthi, u MLA ka Nongstoiñ u la pynpaw ruh ha kaba ïa dei bad ka skul pule Polytechnic kaba la shu sahkut ha Mawrusyiar khlem lah shuh ban pyndep. Kumjuh ruh ha kaba ïa dei bad ka District Jail kaba ym lah shuh ban pyndep mynta shuh lah da ki bun bun phew snem, na ka liang u Bah Gabriel u la pynpaw hapoh ka Assembly.
U la pynpaw ruh ha kaba ïa dei bad ka skhim um hapoh sor Nongstoiñ ïa kaba la tip kum ka Nongstoiñ Urban Water Supply Scheme, kaba la sdang lah bun bun snem hynrei haduh mynta ruh ym pat lah pyndep. Kumta u la kyntu ba ka sorkar ïa kane ruh kan shimkhia na ka bynta ka jingmyntoi jong ki paidbah.
Ha kaba ïadei bad ki marpoh khyndew, u Bah Gabriel u la pynpaw ba ka West Khasi Hills ka don kyrkhai ki marpoh khyndew Hynrei naduh ba khang ka NGT ïa ka kam tih dewiong ki paidbah ka West Khasi Hills ki la mad ïa ki jingeh ha kine ki khyndiat snem ba la leit.
U la pynpaw ruh ba watla ka sorkar ka la pyrshang ban shimkhia ïa kane, ha kaba haduh mynta ki don kumba saw tylli ki ban sa ïoh ïa ka jingbit ban tih dewiong katkum ka rukom tih dewiong ba la ai jingbit.
Lehse ka jingïoh tih dewiong biang ka ban long ruh katkum ki lynti, ka lah ban kyntiew pat ïa ka ïoh ka kot ha thaiñ Nongstoiñ. U la ong na ka West Khasi Hills ka dei ka jaka kaba ïa jan bha bad ka Balpakram National Park, namar kata ka donkam ïa ka sorkar ban pynthymmai ïa ki katto katne ki jingdonkam na ka bynta ki paidbah jong kane ka District.
U la ong ba katkum ki kyndon la kumno kumno 100 hectare donkam ban ïoh ïa ka mining laisen, hynrei u angnud ba ka sorkar ba kan mynjur noh la kumno kumno 30 hectare khnang ba kito ki trai jaka ba don tang khyndiat ka jaka kin ïa ïoh lem ïa ka laisen.
U la ong ruh ba ha Narpuh ka sorkar ka la dep ai jingbit 1 kilometer shiteng na Narpuh Reserve Forest katba ha West Khasi Hills pat ka long haduh 10 kilometer. Ka sorkar ka dei ban ïarap lem ïa ka West Khasi Hills ba kan ai lem kajuh kumba long sha Jaiñtia Hills.