Nongstoiñ, Lber 21: Ka Hynñiewtrep Youths Coun-cil Mawshynrut Circle ha ka sngi hat majai, ha ka jingïa-lam jong u Losbingnel Lyngkhoi President, ka leit jurip ïa ka Community Health Centre (CHC) Mawshynrut. Ha kane ka jingleit jurip, na ka liang ka seng ka la lap ïa shibun bah ki jingduna jong kane CHC.
Ki jingduna ki long naduh ka jingbym don ka Ambulance kit nongpang ba biang, ka um bam um dih, ka FRU, ki Nurses ruh ki duna bha katkum ka jingdonkam ha kane ka CHC ban ai jingshakri ïa ki paidbah. Ki dawai ruh ki duna bha kiba bun hap ban shu thied na shabar kum ki dawai khunlung ruh kim biang, ka investigation test ka biang, ki nong test ha ka lab technicïan ym don, ka rukom ai bam ïa ki nongthiah pang ka duna bha.
Ka seng ka kyntu ïa ka sorkar khamtam ïa ka tnad Health Department kumjuh ïa ka Myntri ka Koit ka Khiah ka Dr. Ampareen Lyngdoh ban shimkhia ha kaba ïa dei bad kane ka CHC, ban pynbiang ïa ka jingdonkam jong kane ka CHC, khnang kan ai ïa ka jingshakri kaba bha ïa ki paidbah. Kumjuh ka seng ka kyntu ïa u nongmihkhmat jong ka thaiñ ba u dei ban shimkhia ha kaba ïa dei bad kane ka bynta.
