Pynbna ka India ïa ka kynhun ki thei ïalehkai phutbol ka ri India na ka bynta ka AFC U-20 Women’s Asian Cup qualifiers
Chennai, Lber 02 : Ka India ha ka sngi Palei ka la pynbna ïa ka kynhun ba 23 ngut jong ki thei ïalehkai phutbol ka ri India kiban ïashim bynta ha ka AFC U-20 Women’s Asian Cup Uzbekistan 2024 Qualifiers Round 1 na ka Group F, kaban sa pynïalehkai ha Vietnam naduh ka 7 tarik mynta u Lber 2023.
Nalor ka India, ka Vietnam kaba dei ka trai jaka, ka Singapore bad ka Indonesia kidei sa ki lai tylli ki ri kiba don lang ha ka Group F.
Ïa katei ka jingïalehkai knieh rung AFC U-20 Women’s Asian Cup Uzbekistan 2024, la phiah ha ki phra tylli ki group. Ki phra tylli ki group kiba jop kin ïoh rung sha ka Round 2, ha kaba kin don saw tylli ki team kiban ïoh rung sha ka wat kaba khatduh ha kaba kin sa ïakhun bad ki lai tylli ki team na ka AFC U-19 Women’s Championship Thailand 2019, ba kynthup ka Japan, DPR Korea, Korea Republic bad ka Uzbekistan.
Na ka liang ka head coach jong ka kynhun ïalehkai U-20 ka Maymol Rocky ka la pynpaw ba ka kynhun jong ka la long kaba la pynkhreh bha na ka bynta katei ka jingleit ïalehkai sha Vietnam.
“Ngi la wanphai na Bangladesh bad ngi la don ha ka ktem kilan met ha Chennai la kumba lai taïew, kumta nga kyrmen skhem ba ki thei ïalehkai ki la long kiba la pynkhreh bha. Ngi la ïoh ban ïalehkai kilan met katto katne ha Chennai bad da shisha ka kynhun jong ki senior ki la ïarap shibun na ka bynta jong ngi ha kane ka jingpynkhreh,” ong ka Rocky.
Da ka jingdon ki nongïalehkai kiba thymmai ha ka kynhun, na ka liang ka Maymol ka ngeit skhem ba kan ïarap na ka bynta kiwei pat ki player.
“Ngi don katto katne ki player kiba thymmai hapoh ka kynhun kibum pat ju ïalehkai mynno mynno, hynrei ki la wan da ka mynsiem kaba thrang shisha ban ïalehkai. Kane kan ïarap ba ngin nang lah ban kyntiew ïa kiwei pat ki player,” ka la ong.
“Ngi burom ïa ki nongïakhun pyrshah bad nga ngeit skhem ba ka Vietnam kaba dei ka trai jaka kan dei ka kynhun kaba khlaiñ bad kumjuh ruh ka Singapore, kiba dang ap khmih lynti ban ïoh rung,” ka la bynrap.
Ïa ka Round 1 yn pynïalehkai naduh ka 4 tarik haduh 12 tarik Lber 2023 bad ïa ka Round 2 naduh ka 1 tarik haduh 11 tarik Jylliew. Katba ïa ka phainal yn pynïalehkai naduh ka 3 tarik haduh 16 tarik Lber 2024.