La kut ka elekshon, jyrwit jyrwat sa ka thaw sorkar….

0

Ka jingjop bun ki nongïalam ba thymmai ha kane ka elekshon MLA kaban dang shu dep ñiew ha kane ka sngi Palei ka la pynkyndit ïa baroh ki nongshong shnong jong ka jylla khamtam eh ha Mawlai, kaba dei ka constituency kaba hapdeng eh jong ka jylla. Ka jingjop jong u kyrtong ka VPP, Bah Brightstar Marbaniang da kaba tam haduh 15648 vote ka la kylla long ka jingjop kaba bun tam eh na baroh 59 ngut ki kyrtong kiba aireng ha kane ka elekshon.
Kumban shu kdew hangne, dei tang ka National People’s Party (NPP) kaba jop bun tam eh na baroh ki party kiba ïakhun ha kane ka elekshon kata haduh 26 ngut, bud sa ka United Democratic Party da ki 11 ngut, nangta ka All India Trinamool Congress bad ka Congress mar 5 seat, ka Voice of the People’s Party 4 ngut, katba ki don lai tylli ki party kata ka BJP, HSPDP, bad PDF kiba ïoh mar ar ngut ki nongjop, bud pat sa ki kyrtong shimet kiba jop arngut.
Mynta ka jingkylli kaba mih ka long la ka NPP kan dang ïatreilang biang neem pat bad ka UDP kaba don 11 seat. Khlem pep lada kitei ki ar tylli ki party ki treilang lehse yn ym donkam shuh ïa kiwei pat ki party namar ka la poi haduh 37 ngut bad lada kynthup lang sa ïa ka BJP la poi sha ka 39 ngut. Kumba ka long mynta ym pat ïoh jingtip satia la katei ka jingpynkhreh thaw sorkar shano kan poi namar na ka liang ka UDP ruh kam pat kren shai lait noh tang ka BJP kaba la leit ban tyrwa bad kynduh ïa u National President ka NPP, Conrad K Sangma ba dei ruh u Myntri Rangbah ka jylla. Hynrei lada jia pat ba ka UDP kam treh ban treilang, ka lynti ka long sa tang ba ka NPP kan khroh ïa ka Congress kaba jop san ngut bad ruh la kumno kumno ïa ka PDF ne HSPDP bad ruh ïa ka BJP. Lada leh kumta ka sorkar ba thymmai kan poi beit sha ka 37 ngut. Lada long katba long, kane ka sorkar ba thymmai kan kynthup lang ia ka BJP kumjuh ruh ia kine ki party riewlum kiba don lang kajuh ka jingmut.
Ha kawei pat ka liang, lada ka UDP kaba don 11 ngut, kumjuh ka VPP kaba don saw ngut bad ruh ka TMC kaba don saw ngut kim lah ban khring paralok lane kim sngew ïahap ban ïatrei lang, lehse kin lah ban thaw ïa ka Liang Pyrshah kaba khlaiñ bha namar bun ki MLA kiba don ha kitei ki kynhun ki dei ki nongïalam ba la shemphang, kiba nep ka jabieng bad ruh ki bym riej ban kren. Watla ka Iing Dorbar Thawaiñ kan ym ïohi shuh mynta ka samoi san snem ïa u MLA ka Mawsynram, Bah HM Shangpliang bad ruh u MLA ka Umroi, Bah George Lyngdoh hynrei ka la sei bad pynjop biang ïa ki arngut ki nongïalam sengbhalang ba rim kiba dei ruh ki MLA barim kata u nongïalam barim ka KSU Bah Paul Lyngdoh bad ruh u nongïalam barim ka FKJGP Bah Ardent Miller Basaïawmoit.
Ym lah ruh ban tip ba ïoh lehse kan poi pynban haduh u pud ba kiwei ki party kin ïatrei lang bad pynshong ïa ka NPP ha ka Liang Pyrshah. Kitei ki party lada ki nud shisha ban leh kumta khlem pep kan thaw ïa ka rekod ha kane ka jylla ba ka party kaba don bun ki MLA kan ngat ha kata ka apot. Tangba ha kane ka liang ruh lehse kan ym lah ban long kumta namar da lei lei ruh ka TMC bad ka BJP kin ym lah ban treilang. Kumta, katba ym pat lah ban pynbeit, baroh ki nongshong shnong ka jylla kin sah haka umduh bad ka lyngoh namar kim tip kaba kumno ka sorkar kin ïoh bad mano ban ïalam ïa ka.

Leave A Reply

Your email address will not be published.