Shillong, Lber 01: U Chief Electoral Officer (CEO) jong ka election Commission of India (ECI) uba dei peit ïa ka jylla u Bah FR Kharkongor, ha ka sngi Balang, u la hukum ïa u District Election Officer (DEO) jong ka Ri-Bhoi District ban pynlong da ka jingtohkit mardor halor ka jingpynkheiñ ïa ki kyndon da kaba shondur ha ka por ba ki thep vote kaba la jia ha Mawhati constituency ban pyni ba uwei napdeng ki nongthep vote u pyni ba u la thep ïa ka vote ha u kyrtong na ka Congress.
Na ka liang u CEO u la bthah ba ïa ka ka Action Taken Report (ATR) dei ban aiti sha u hapoh ka 3 tarik u Lber.
Kane ka hukum jong u CEO ka long hadien ba la iohi ba ka dur kaba la shon da uwei napdeng ki nongthep vote ka la saphriang ha ki rynsan social media. Lah ban kdew ba na ka liang ka ECI ka la mana ïa ki nongthep vote ba kim dei ban pynpaw pyrthei ïano ki thep ïa ka vote jong ki bad ba ka la mana ruh ban rah mobile ha ki jaka thep vote lait noh tang kito ki paidbah nongthep vote.
“Haba ïadei bad kane ka jingpynkheiñ kyndon, phi kum u DEO ka Ri-Bhoi phi dei ban phah mardor ïa ka jingtohkit ban lah pynshisha ïa kane ka jingkynnoh, kaba la mih ha ka 35-Shiliang Umdoh Polling Station jong ka Mawhati Constituency,”ong ka hukum u CEO sha u DEO ka Ribhoi.
U CEO u la bthah ïa u DEO ban leh tyngeh pyrshah ïa ki Polling Official jong kane ka Polling Station kiba shah ban rah mobile bad shondur hapoh ka kamra thep vote, hadien ba la dep tohkit.
“Dei ban ai jingpynsaja pyrshah ïa u nongthep vote namar u pynkheiñ ïa kane ka kyndon hadien ba dep pynshisha ïa ka jingleh jong u” u la ong.
Shuh shuh sa ha kawei pat ka jingjia kaba kum kane kaba la jia ha Mairang Constituency ha kaba ki paidbah ki la phah ïa ka video sha ki lad pathai khubor kaba pyni ïa uwei u nongthep vote uba dang khñiot ïa u budam ha pyrshah ka shab jong ka Bom.
Ha kaba ïadei bad kane ka jingjia, u Returning Officer jong ka Mairang Assembly Constituency u la mudui da ka ejahar sha ki pulit jong ka Mairang Police Station hapoh ka kyndon 49M jong ka Conduct of Election Rules, 1961. Ïa kane ka jingujor la phah jingtip ruh sha u DEO jong ka Eastern West Khasi Hills District ha kaba la pyntikna ba kane ka jingjia ka dei kaba hap hapoh ka polling station jong ka Pyndengumiong Dong Gate, Mairang.
