La dep pynkhreh bad pynbit pynbiang nadong shadong na ka bynta ban ñiew vote: CEO

Shillong, Lber 1 : Sa tang da ki kynta, ki minit bad sekhon la sdang ka jingniew vote ki kyrtong ki la lynga bad pisa mynsiem, katno kin don kiba kyiuh bad syier bad tied sted u klongsnam khamtam ïa kito kiba dang ïaleh nyngkong eh ïa ka election bad na ka bynta kane ka jingñiew vote ka jingpynkhreh pynkhrum bad pynbit pynbiang da ki bor pynïaid ka tnad Election ka ladep lut nadong shadong.
Ki don 369 ngut ki kyrtong kiba ïa aireng ha ki 59 tylli ki constituency na ki seng saiñ pyrthei bapher bapher bad kum ki kyrtong shimet ruh. Ka jingthep vote ka lah dep long ha ka 27 tarik u Rymphang 2023 bad kiba la poi ban thep vote ha baroh kawei ka jylla ki long 85.51 %.
“Ngi la dep pynbiang lut nadong shadong na ka bynta ka jingñiew vote lashai ka sngi. Ki don 13 tylli ki jaka niew vote 12 tylli kin dei ha ki nongbah jong ki District bapher bapher bad kawei ka dei ha ka Sohra Civil Sub Division” ïathuh u CEO ka jylla u bah F.R Kharkongnor mynta ka sngi Balang. U la ïathuh la buh 22 pyrton ki CAPF ban pahara baroh 24 kynta ïa ka kamra ba kyrpang ne Strong Rooms kaba la buh ïa ki EVM na ki 3419 tylli ki Polling Station ha ki 59 tylli ki Constituency.
La pynkhreh ba ka rukom pahara kan long ha ki lai syrtap, ka bynta ba shapoh ne kaba nyngkong duh yn pahara da ki CAPF bad ïa ki bynta ba shabar kata ka syrtap ba ar bad ba lai yn pahara da ki bor pulit ka jylla.
La buh ïa ki CCTV ha baroh ki miej ban ñiew ïa ki vote. Ka jingñiew kan long haduh 383 sien bad kaba bunsien tam kan long 9 sien ïa ka Constituency ba heh tam ka Mawlai, East Khasi Hills bad 4 sien ñiew ïa ka constituency ba rit tam ka Dalu, West Garo Hills.
“ Ka jingñiew vote ha baroh kine ki 13 tylli ki jaka ñiew kan sdang naduh ka por 8 baje mynstep bad ha kaba sdang yn ñiew shwa ïa ki Postal Ballot kumba 30 minit ei ei bad hadien kane yn sa sdang ïa ki EVM” ong u CEO.
U CEO haka jingsynran lang u DEO bad SP u la leit jurip da lade ïa ka jaka ñiew vote ha East Khasi Hills kaba la pynkhreh ha madan Polo, Shillong. Kin don haduh 14 tylli ki kamra ban ñiew bad kawei ka kamra kan long na ka bynta kawei ka constituency.
Kaba bud ka dei ka West Garo Hills kata ha Tura ha kaba yn niew ïa ki 11 tylli ki constituency. Ka ECI ka la buh 27 ngut ki Observer ki ban peitngor bha ïa ka jingñiew vote bad kin don haduh 500 ngut pat ki ban ïarap ïa ki. Kine kin peit bniah bad peit thuh ïa ka rukom ñiew ha man la ki miej niew vote.
U la ïathuh ba la bthah ruh ïa ki DEO ha baroh ki district ba kin peit ba kan ym don ka jingïaïaid paidbah hadien ba la jop khnang ba kan ym ktah ïa ka leit ka wan jong ki paidbah.