Shillong, Lber 01: U Deputy Commissioner (DC) jong ka East Khasi Hills u Sibhi Chakravarthy Sadhu ha ka sngi Balang u la pynmih ïa ka jingmana ba ki kyrtong kim lah satia ban pynlong kano kano ka jinglehkmen hadien ba ki la jop ïa ka elekshon da ka jingïaid paidbah ne ka jingïalang paidbah tad haduh ka por 4baje jong ka 4 tarik u Lber 2022.
Kumban shu antad ba lehse kane ka jingkhang jong u DC ban ïaid paidbah ne ïalang paidbah ha East Khasi Hills lehse kum shibynta ban tehlakam ïa ka jingjhapngiah ka surok kaba la wanlam pat ia ka jingdheng kali ha baroh kawei ka bynta ka Shilong kumba la jia ha ka por ba ki kyrtong ki leit ban thep kyrteng ban ïakhun ïa kane ka elekshon.
Kumban shu pynkynmaw hangne ba ka jingmih da u paidbha byllien ban synran ïa ki kyrtong kaba ki kyrshan ha ka por ba ki leit thep kyrteng ha ophis jong u DC ka la wanrah ka jingkordit kaba khraw ïa ki paidbah nongleit nongwan namar ka jingkahpngaih ka surok bad ka jingneh ka dheng kali da ki bun bun kynta ha kaba wat ki ambulance ruh ki la sahkut lang na ka daw ka jingïamih ki paidbhur.
