Pluh ka shnong Mairang bym hun ki paidbah ïa ka jingpynbna resol ka ophis u DC, iap uwei

>> Kawang maw ki paidbah ïa ka ophis u SDO ha Sohra >> Shah kawang maw ki ïing ki nongkyrshan UDP ha Sahsniang

0

Shillong, Lber, 02: Tang hapoh khyndiat kynta ba ka ophis jong u Deputy Commissioner ka Eastern West Khasi Hills District ka la pynbna ïa ka result jong ka elekshon MLA ha ka sngi Palei, ki paidbah nongshong shnong jong ka Mairang Constituency ki bym hun satia ïa kane ka jingpynbna ïa ka result ki la tur paidbah sha ka ophis jong u Deputy Commissioner bad thaw jingkulmar kat haduh ban da wiang ding wat ïa ki kali kiba don ha phyllaw jong ka ophis u Deputy Commissioner.
Ha ka jingñiew vote, u Bah Metbah Lyngdoh uba long u kyrtong ka United Democratic Party (UDP) u la ïoh khur vote da 19066 katba u Bah Batskhem Ryntathiang u la ïoh khur vote da 18911.
Ha kane ka jingjia, ki bor Pulit bad ki shipai BSF ki la ïada tyngeh ïa ka ophis u Deputy Commissioner ban lait na kano kano ka jingshah pynjulor ha ki paidbah kiba la dap da ka jingbitar wat hadien ba ki la shah kawang da ki maw ha ki paidbah.
Ban pynpra ïa ki paidbhur kiba la thaw jingkulmar bad kiba la pynjulor ïa ki nongkynti ka sorkar da kaba wiang ding, ki Pulit bad ki shipai BSF ki la hap ban siat da ki bom pynsat khmat sha ki paidbah.
Kat haduh ba la thoh ïa kane ka khubor ym pat shym la ïoh jingkheiñ satia haduh katno tylli ki kali ki la shah wiangding bad ym pat shym la ïoh jingtip satia la ki bor synshar District ki la pynjari neem da ka Section 144 CrPC ban tem ïa kane ka jingkulmar.
U Mawphor haba ïakren bad u Superintendent of Police ka Eastern West Khasi Hills u Bah M. Syiem u la ïathuh ba la lap ïa uwei u briew uba la thiah lyngktar ha surok hapdeng ka jingphlei snam. U la ïathuh ruh hadien ba ki bor pahara ki la siat pyntieng sha suiñ ban pynpra ïa u paidbhur bad ha kane ka por ki paidbah ki la phet ruma bad ynda la kham thanda ki paidbah ki la lap ïa une u rangbah uba la kyllon hapdeng surok bad pynkit noh marmar sha Hosital Mairang.
U SP u la ïathuh ruh ba ki bor synshar district ki la thung ïa ka jingtohkit halor kane ka jingjia.Ka jinghuri hura ka la jia ruh ha ka shnong Sahsniang kaba dang hap hapoh ka Mowkaïaw Constituency tang hadien ba ladep ka jingñiew vote bad hadien ba u kyrtong ka UDP u Bah Nujorki Sungoh u la shah jied biang kum u MLA jong ka Mowkaïaw Constituency. Katkum ka khubor ba la ïoh lum la ïathuh kynnoh ba ki nongkyrshan jong ka NPP kiba la khie bitar bad ki bym lah satia ban pdiang ïa kane ka jingshah rem ki la lun maw ïa ki ïing ki sem jong ki nongkyrshan ka UDP ha ka shnong Sahsniang ha ka sngi Palei.
Ka tyllong khubor ka ïathuh ruh ba ki nongkyrshan ka NPP ki la pakhang lynti ïa ki nongkyrshan jong ka UDP bad pyni bor ruh wat ïa ki Pulit CRPF kiba ap pahara ha ka shnong Sahsniang.La ïathuh ruh ba ka la don ka jingthmu wat ban wiang ding ïa ki kali jong ki nongkyrshan ka UDP.
Ban tem ïa kane ka jinghuri hura ha ka shong Sahsniang u District Magistrate jong ka West Jaiñtia Hills District u Bah B.S Sohliya u la pynjari da ka Curfew hapoh ka Section 144 CrPC tad haduh ban da pynbna da kumwei pat.
Ka jinglong jingman mynta ha ka shnong Sahsniang ka la shong syier bha hadien kane ka jingjia.
Kum ban shu pynkynmaw ha u snem 2019 ha ka elekshon MDC ka jinghuri hura ka la jia ha ka shnong Mowkaïaw hadien ka jingjop jong u kyrtong ka UDP ha kaba ki nongkyrshan jong ka NPP ki la pynjulor ïa ki ïing ha kane ka shnong.
Ha Sohra, ki paidbah kiba la dap da ka jingbitar shla halor ka jingbym hun ïa ka jingpynbna resol ïa ka Shella Constituency ki la thaw jingkulmar da kaba kawang maw ïa ka ophis jong u Sub Divisional Officer ka Sohra Civil Sub-division bad ïa ka District and Session Court bad wiang ding ruh ïa ka lum kaba don markhap bad ka ophis jong u Sub Divisional Officer.
Kane ka jingjia kaba la neh katto katne ka la thanda noh hadien ba ki paidbah ki la leit phai noh sha la ki jong ki shnong ki thaw. Ka kynhun jong u kyrtong ka NPP na Amlarem Constituency u Bah Stephanson Mukhim ki la dawa ïa u Deputy Commissioner ka West Jaiñtia Hills District ban ñiew biang ïa ka Vote hadien ba ki la kam ba ka vote ka la jah jin haduh 200 tylli.

Leave A Reply

Your email address will not be published.