Hato yn bteng ka MDA-II ban synshar ha jylla? Mynta yn leit ïakynduh u Conrad ïa u Lat
Leit tyrwa ai jingkyrshan ka BJP, dang ïakren bad ka UDP, PDF, HSPDP
Shillong, Lber 2 : Tang hadien katto katne kynta ba la dep ñiew vote bad ba ka NPP ka la jop bun eh da 26 ngut ki MLA, mynta hi ka miet ki nongïalam ba hakhmat ka NPP ba kynthup ïa u Conrad K Sangma, bah Prestone Tynsong, ma Sniawbha Dhar, ma Comming Ymbon bad kiwei kiwei, ki la ïakynduh lang ha ïing jong u Myntri Rangbah u Conrad K Sangma ban ïakren na ka bynta ban thaw ïa ka sorkar ba thymmai.
Ha kane ka jingïakynduh na ka liang ka BJP lyngba u President jongka u bah Earnest Mawrie u la wan ban ai ïa ka shithi ba ka BJP kan ai ka jingkyrshan ïa ka NPP ban ïalam ban thaw sorkar. Ka jingïakren pat bad ki nongïalam ka UDP, HSPDP, PDF bad ki kyrtong shimet ruh ka dang ïaid shakhmat.Hato kine ki party kin pynskhem ban ïatrei lang biang ha ka lama MDA-II ne kin thaw noh da kawei ka kynhun?.
Kat haduh ba thoh ïa ka khubor ym pat ïoh jingtip la ka don ne em ka jingpyrshang ban ïakren bad ka VPP ruh namar haba pyrshang ban phone ïa ki nongïalam ruh ym ïoh satia ban ïakren.
Na ka liang u Conrad K Sangma Sangma un leit ïa kynduh ïa u Lat ka jylla u Phagu Chauhan na ka bynta ban ïakren ban thaw sorkar. Namar kum ka Party kaba jop bun paid eh ka NPP ka don ha hok ban leit kam thaw sorkar hakhmat u Lat.
Ka khubor napoh ka Party ka pyntip ba ka kynhun ban ïalam da u National President ka NPP Conrad K Sangma, kan sa leit ïakynduh lashai mynstep ha ka por 11.30 ïa u Lat ka Jylla ha Raj Bhavan ban kam thaw ïa ka sorkar ba thymmai.
Ka BJP pat ka la wan ban ïatrei lang bad ka NPP hadien ba ka la ïoh ka jingbthah na u President ka seng kmie u JP Nadda.
Na ka liang u Myntri Rangbah u Conrad K Sangma u la ong “ Nga ai khublei ïa ki paidbah ka jylla kiba la ai ka jingshaniah ha ka NPP bad nga kular ruh ba ka NPP kan ai ka jingshakri hok ïa ki paidbah ha ki por ban wan da kaba kan wanrah ïaka roi ka par, kan ïarap ïa ki nongrep, ïaki kup shilliang ki sem shilliang, ban kyntiew ïa ki kam ïalehkai sport, ban pynïasoh ïa ki shnong da ki surok, kan pynbiang ïaka umdih, ka bording bad bun kiwei kiwei ki jingdonkam jong ki paidbah”.