Jluk khlem da pynbna paidbah, rung BJP ki MLA jong ka UDP ha New Delhi
Ka 23 tarik Nailur ka sngi sah kynmaw ïa ka BJP ha Meghalaya
Shillong, Nailur 23: Ka 23 tarik u Nailur 2026 kan dei ka sngi sah kynmaw ïa ka Bharatiya Janata Party (BJP) ha kaba ki phra ngut ki MLA ka UDP kila pynïasoh pura ïa lade sha ka BJP mynta ka sngi Balang hapoh ka headquarter ka BJP ha New Delhi.
Kane ka jingleit ban pynïasohjong kine ki MLA ka UDP kala pynlong ïa ka BJP hapoh ka jylla Meghalaya ban kiew sha ka shiphew ngut ka jingdon jong ki MLA ka party.
Ïa kine ki MLA jong ka UDP la pdiang ïa ki da u Myntri ka Sorkar Pdeng u Kiren Rijiju ha ka jingiadonlang u Nongaiktien jjong ka BJP ba peit bad khmih ïa ka North East u Sambit Patra bad kiwei kiwei ki nongialam.
Ki phra ngut ki MLA ki kynthup ïa u Bah Lahkmen Rymbui, u Bah Kyrmen Shylla, u Bah Balajied Kupar Synrem, u Bah Synshar Kupar Roy Lyngdoh Thabah, u Bah Pius Marwein, u Bah Mayralborn Syiem, u Bah Ollan Sing Suin bad u Bah Matthew Beyondstar Kurbah.
Haba pdiang ïa ki, u Rijiju ula ong ba ki MLA kila rai ban iasoh sha ka BJP hadien ba ki sngewtynnad ïa kaei kaba u batai kum ka jingkylla jong ka thain Shatei Lam Mihngi hapoh ka jingïalam u Myntri Rangbah Duh Narendra Modi bad ka Sorkar NDA ba ialam da ka BJP.
U Kiren Rijiju u la ong,”Naduh ka mynsiem ngi pdiang sngewbha ïa baroh ki paralok, ki phra ngut ki dkhot ka Iingdorbar Thaw Ain, ki MLA ka Meghalaya sha ka longïing jong ka BJP”.
U Rijiju ula ong ba ka jingwan rung ki phra ngut ki MLA kan nang pynkhlain ïa ka Sorkar ba ialam u Conrad K Sangma bad nang pynkhlain ïa ka jingiatreilang hapdeng ki paralok NDA ha Meghalaya.
Kane ka jingleit kynthih seng ki phra ngut ki MLA, kala khate ïa ka jingdon MLA ka UDP na ka 12 ngut sha ka 4 ngut bad pynlong ïa ka BJP kum ka party kaba wan ba-ar ha ka jingdon bun ki MLA hapoh ka Iingdorbar Thaw Ain hadien ka National People’s Party (NPP) u Myntri Rangbah Conrad K Sangma, kaba don 33 ngut ki MLA.