Jop bun ka NPP bud ka UDP pynkyndit bynriew ka VPP

Kyrhuh u Sing ha ki ar tylli ki ktem, trei bor bah u Panah bad Meinah

0

Shillong, Lber 02 : Ka National People’s Party (NPP) ba ïalam da u Conrad K Sangma kum u National President, kala ïoh khur ïa ka jingjop ba bun eh kaba la jop haduh 26 ngut ki MLA na ki 59 tylli ha kane ka elekshon MLA-2023 ba ïathep vote myn ha ka 27 tarik Rymphang. Kaba bud pat ka dei ka UDP kaba la jop haduh 11 ngut ki MLA bad kaba pynkyndit bynriew thret pat ïa ki paidbah ka dei ka VPP namar ka la jop haduh 4 ngut ki MLA khamtam lei lei ka jingtam bun eh ha ka Mawlai Constituency pyrshah ïa u MLA bah P.T Sawkmie bad MDC bah Teibor Pathaw.
Ka AITC kaba la ïaid kylleng ki jaka lyngba ka kynhun IPAC da ki bun bun bnai ban pynkhreh ïa ka elekshon bad ruh da ka jingpynbang ïa ki kular kum ka WE Card bad MYE Card, kala ïoh jingjop tang 5 seat. Kaba pyndiaw ïa ka AITC ka dei ka jingshah rem jongka kurim jong u Dr Mukul Sangma ka Dikkanchi D Shira bad u para jong u u Zenith Sangma.
Kine ki kyrtong ka AITC ba jop ki dei u Bah Charles Pyngrope President ka Meghalaya Pradesh Trinamool Congress na Nongthymmai, ka Miani D Shira na Ampati u Rupa M Marak na Dadenggre, bad u Dr Mizanur Rahman na Rajabala.
U Dr Mukul Sangma Nongïalam ka AITC ula shu jop da ka said na Songsak constituency bad tam tang 372 vote ïa u kyrtong ka NPP u Nihim D Shira. Une u Nongïalam ka AITC ula shah pynrem ha Tikrikilla ha u MLA barim bad kyrtong ka NPP u Jimmy D Sangma.
Ka BJP kaba la ther bha ha Ri-lum Garo, kaba la pyni ruh ïa ka jingshimkhia jongki Nongïalam na Delhi naduh u Myntri Rangbah Duh ka Ri Narendra Modi, u Myntri kam pohïing Amit Shah bad u President JP Nadda bad kiwei kiwei, ka khlem lah thaw pyrthei satia bad kala ïoh ban khur hi tang artylli ki seat kiba dei na Nongbah Shillong.
Kine ki dei tang ka Pynthorumkhrah bad ka South Shillong Constituency. Ki Nongïalam ka BJP Bah A.L.Hek bad Bah Sanbor Shullai kila jop na kine ki constituency ban pynneh ïa ka jinglong MLA.
Ka Congress party ruh kala ïoh khur tang shi seat ha Ri-Lum Garo kaba long san ngut baroh lang kynthup ïa 4 ngut na Ri-lum Khasi bad Jaintia.
U President ka Meghalaya Pradesh Congress Committee bad MP ka Shillong sha Lok Sabha ma Vincent H pala, ula shah pynliem ha ka kyrtong ka NPP kong Santa Mary Shylla na Sutnga Saipung Constituency.
Ka Party kaba wan ba-ar ha ka jingjop bun ki MLA ka dei ka United Democratic Party (UDP) kaba la jop 11 seat. Kiwei pat ki seng riewlum ki dei ka VPP-4, PDF-2, HSPDP-2.
U Myntri Rangbah ka Jylla uba la jop ïalade na South Tura Constituency, ula wan phai mynta sha Shillong ban ïakynduh ïa ki Nongïalam jong kiwei pat ki seng saiñ pyrthei ha kaban ïapynbeit ïa ki kam ki jam ba ïadei bad ka jingthaw ïa ka sorkar thymmai ha Jylla.
Kumba long hi man la ka election u Sing da long kumno kumno ruh u kyrhuh beit ha West Khasi Hills namar mynta ka kynti u la kyrhuh ha kawei ka ktem ha West Khasi Hills bad ha kawei pat ka ktem ha Eastern West Khasi Hills.
Katba lada phai sha ka VPP pat ka jingtrei shitom bad borbah jong i Kongdeng Kongnah bad Meinah Panah ka la pynkhihwin ïa ka lyer jongka VPP kaba la sar haduh saw tylli ki constituency ha kane ka sien mih pyrthei kaba nyngkong jongka.

Leave A Reply

Your email address will not be published.