Mynjur ka sorkar ban pynduh noh ïa ka MCCL bad yn thaw noh da ka Eco-Tourism bad Cultural Hub

Shillong, Risaw 13: Ka Kynhun Myntri sorkar ka Jylla Meghalaya ka la mynjur ïa ka jingkhang bad pynkut noh ïa ka Mawmluh Cherra Cements Limited (MCCL), kaba pynkut noh ïa ka tnat treikam paidbah kaba rim tam jong ka jylla hadien ba ka la treikam da ki phew snem ha Sohra.
La seng ïa ka ha ki snem 1960 ba sdang hapoh ka Assam bym shym pat la phiah, ka MCCL ka dei ka karkhana shna dew bilat kaba rim tam jong ka sorkar Meghalaya.Ka don ha ka thaiñ Sohra kaba riewspah ha ki mawshun, kane ka karkhana ka la don bynta ha ka jingpynroi ïa ki karkhana jong ka thaiñ shwa ban ïakynduh ïa ki snem jong ka jingeh ha ka liang ka pisa tyngka, ki mashin kiba la tymmen bad ka jingbym lah ban treikam bha.
Ka sorkar ka la sdang ïa ka jingpynkut noh ha kaba kut jong u snem 2023 hadien ba ki jingpyrshang ban pynim biang ne pynlong shimet ïa kane ka jaka kim shym la lah ban ai ïa ka lynti kaba lah ban ïaid shakhmat.
Kum shi bynta jong ka jingkhang, ka sorkar ka la ai ?98.25 klur hapoh ka Voluntary Retirement Scheme and Voluntary Separation Scheme.Ka package ka la pynkhuid ïa ki jingsiew kiba dang sahteng na ka bynta ki 201 ngut ki nongtrei.
Ka kynhun myntri ka la mynjur ruh ban weng noh ïa ka sale tax kumba ?8.9 klur bad ?15.53 klur ha ka jingkitkhlieh jong ka jingtih mawshun kaba dei ban siew sha ki tnad jong ka jylla, kaba la pynsuk ïa ka jingkhang khyrdep ïa ka kompeni.
U Myntri Rangbah ka Jylla Conrad K. Sangma u la ong ba ka sorkar ka thmu ban pynbha biang ïa katei ka jaka kaba thylli ban pynlong ïa ka Eco-Tourism bad Cultural Hub.
Ka jingthmu ban pynbha biang ka thmu ban pyndonkam ïa ka mariang jong ka Sohra ban kyntiew ïa ka kam jngohkai pyrthei kaba neh, ban pynmih kam bad ban thaw lad na ka bynta ki nongseng kam seng jam ha ka thaiñ, kaba pynpaw ïa ka jingkylla na ka jinglong tynrai jong ka thaiñ sha ka jingkiew ha ka ïoh ka kot ba la ïalam da ki paidbah.