Ba mih ka jingsma ba shyrkhei khang tala ka FKJGP ïa ka karkhana shna jingbam masi ha Baridua

Nongpoh, Risaw 13: Ka Seng Federation of Khasi Jaiñtia and Garo People (FKJGP), Baridua Circle, hapoh ka jingïalam jong u Bah Denis Nongrum, President ka FKJGP Baridua Circle, ryngkat bad u Bah Allan D. Sohpdang bad kiwei ki dkhot ka Seng mynta ka sngi ka la khang tala noh ïa ka karkhana pynmih jingbam masi kaba la tip kum ka Megha Food, kaba don ha shnong Baridua, Ri-Bhoi District, hadien ka jingmih jong ka jingsma kaba jur na katei ka karkhana, kaba la wanrah jingeh bad ktah ïa ki paidbah nongshong shnong.
Ka seng kala shim ruh ïa kane ka sienjam dei namar ka jingujor naki paidbah halor ka jingsma kaba mih na katei ka karkhana kaba jur haduh katta katta, kaba la pynlong ïa ki paidbah ban ud bad pyrshah, namar ka jingktah ha ka jingim ba man la ka sngi.
Haba kren hadien ka jingleit khang tala, u Bah Denis Nongrum kum u President ka seng u la pynpaw ba naka liang ka seng ka la shim ïa kane ka sienjam hadien ba ka la ioh pdiang shibun ki jingujor na ki paidbah nongshong shnong ka Baridua, kiba la pynpaw ïa ka jingsngewkhia halor ka jingsma kaba mih na katei ka karkhana.
U la ong ruh ba ka Seng ka la lap ba katei ka karkhana ka pynïaid ïa ki kam jong ka khlem ki kot ki sla kiba donkam, kynthup ïa ka No Objection Certificate (NOC) na ka shnong bad kiwei pat ki jingbit bad ki kot ki sla kiba donkam ban pynïaid ïa katei ka karkhana.
Na ka liang u Bah Ioanis Narleng, Rangbah Shnong ka Baridua, u la pynshai ba katei ka karkhana kam pat ioh satia ïa ka NOC na ka shnong. U la ong ba ka shnong ka la ai jingmut ïa ki trai jong katei ka karkhana ba kin sdang pynïaid shwa ïa ka kam jong ki ha ka rukom kaba lah ban tehlakam ïa ka jingsma. Lada ka jingtreikam jong ka karkhana kam wanrah jingeh ïa ki paidbah, ka shnong kan sa pyrkhat ban ai ïa ka NOC.
Hynrei, u la ong ba ka jingtreikam jong katei ka karkhana ka la pynmih ïa ka jingsma kaba jur, kaba la wanrah ïa ka jingpyrshah na ki paidbah nongshong shnong.
Naka liang u Bah Ioanis Narleng u la ai ka jingïaroh ïa ka FKJGP Baridua Circle halor ka jingshimkhia ban sngap ïa ka sur bad ki jingujor jong ki paidbah, bad ban khang tala syndon ïa katei ka karkhana mynta ka sngi.