Shillong, Lber 02: “U Blei U la jubab ïa ka jingduwai jong ngi”. Kine kidei ki kyntien sngewnguh jong u Bah Ardent Miller Basaiawmoit, President ka VPP bad MLA ba thymmai ka Nongkrem, haba la kylli da u Nongthohkhubor.
“Kadei shispah percent kaba phi ong,namar kum ka Party naduh ba sdang, ngi la buh jingduwai bad shaniah ha U Blei”, la ong u Ardent.
U la ong ruh ba ha ka jingshisha ka Party ka khmih lynti ban jop khambun, hynrei namar ka jinglyngkot ka por ym shym la ioh lad bha ban leit pynshai sha kiba bun tylli ki Shnong.
Nalorkata ruh ki Kyrtong jong ka Seng ki dang dei kiba thymmai.
Hynrei kum ka Party ka kmen pat ba ki paidbah ki la pdiang ia kane ka Seng kaba thymmai.
Haba la kylli pat la kane ka jingjop saw ngut ki MLA jong ka Party kadei ne em ka dak ba ki paidbah ki la kwah ïa ka jingkylla, u Bah Ardent u la ong ba ka VPP ka pynïakhun tang 18 ngut ki Kyrtong, hynrei ka la jop saw ngut, kaba pyni ba ki paidbah hi ki angnud ïa ka jingkylla.
Halor ka jingkylli kaei ba ka Seng kan leh ha kaba ìadei bad ka jingthaw Sorkar, u Bah Ardent u la ong ba ka Seng kam pat pyrkhat ïa kane, hynrei kan sa shong pyrkhat ban ïakren halor kane
U Bah Ardent u la pynpaw ruh ka jingai khublei bad sngewnguh ïa ki paidbah kiba la ai ka jingkyrshan ia ka VPP bad kyntu ia ki ba kin dang ïa ka jingkyrshan bad ka jingieit khnang ba kum ki nongïalam kin nang ïai trei na ka bynta ka ri bad ka jaidbynriew.
