Shillong, Lber, 02: Ka National People’s Party (NPP) ha ka sngi Palei ka la smai ban trei shitom na ka bynta ki paidbah jong ka Jylla Meghalaya hadien ba ka la ïoh ïa ka jingjop kaba bun paid ha ka elekshon sha ka Iingdorbar Thawaiñ ka Jylla.
“Nga ai khublei ïa ki paidbah jong ka Jylla kiba la pynjop ïa ka party jong ngi,” ong u National President ka NPP u Conrad K. Sangma haba ïakren bad ki lad pathai khubor hadien ka jingshah jied biang kum u MLA jong ka South Tura bad pynliem lyndang ïa u nongïakhun pyrshah u Bernard N. Marak uba la ïakhun na ka tiket jong ka BJP.
U la ong ba ka Party kan sa rai kumno ban ïaid shakhmat hadien ba ladep pynbna ïa ka result mynta ka sngi.
Sa shisien pat hadien ka jingjop ha ka kylla kaba san mynta ka kynti na Pynursla Constituency u National Vice President jong ka NPP, u Bah Prestone Tynsong u la ong, “nga ai khublei ïa ki paidbah kiba la ai biang ïa ka jingshahniah ha ngi. Ngin sa nang trei kham bha shuh shuh.”
Haba pynpaw ba u don ka jingsngewsih khyndiat namarba ka Party kam shym la lah ban jop haduh 31 ngut, u Bah Prestone u la ong, “hynrei, ngi smai ban trei shitom na ka bynta ki paidbah nongshong shnong jong ka jylla.”
Haba kylli hato ka NPP ka kloi neem ban ïatreilang bad ka BJP ha kane ka kynti, u Bah Prestone u la ong, “peit ngan ïathuh ïa phi bad kam shym don kano kano ka jingïateh soskular kum ka MDA hynrei ïa kata ngin sa rai hadien. Kaba nyngkong, nga dang ap tad haduh ban da wan poi u Conrad Sangma na Tura. Un sa wan poi (sha Shillong) mynta ka miet bad hadien kata ngin sa shong ban ïathir ïatai sani.”
Halor ka jingkylli, hato u nongïalam ka BJP u Himanta Biswa Sarma uba long u nongpynwandur ïa ka sorkar ba ladep ha Meghalaya, un dang don bynta neem mynta ka kynti, u Bah Prestone u la ïathuh, “u Myntri Rangbah ka Jylla Assam u dei ruh u Chairman jong ka NEDA bad uba peit ïa ki jylla ha ka thaiñ Shatei Lammihngi bad u Conrad Sangma ruh u ladep ïakynduh ïa u tangba kam mut pat ba un (Himanta Sarma) dei u nongpynwandur ha ka jingthaw ïa ka Sorkar. Kam long kumta. Kumba nga ladep ïathuh ïa phi, mynta ngin sa shong na ka liang jong ngi bad ngin sa rai badno ban ïatreilang sa ha kane ka kynti.”
Ha kaba ïadei bad ka jingdawa ban sei Myntri Rangbah na rilum Khasi-Jaiñtia, u Bah Tynsong u la ong, “ki paidbah ki ladep ai ïa la ka jong ka rai ha rilum Khasi-Jaiñitia bad nga kyntu ba kim dei ban wanrah ïa ka jingsngew ïapher jaidbynriew halor ka ishu ban jied Myntri Rangbah.”
“Wat ka party ba thymmai kaba dang shu pynkha dang kumba ar ne lai bnai mynshwa ruh ki ïoh haduh 4 Seat lada ngam bakla namarkata, ban phohsniew ba ngi dei ban ïoh beit ïa u Myntri Rangbah da u Khasi lane Jaiñtia, ha ka jingsngew jong nga shimet ngim dei ban kdew eiei shaphang kata namarba ngi dei baroh ki nong Meghalaya la ka long ki Khasi, la ka long ki Jaiñtia bad ngi dei baroh ki nong Meghalaya te balei pat ban wanrah ïa ka jingsngew ïapher jaidbynriew, ngim dei ban pynlong ishu ïapher jaidbynriew halor ka shuki Myntri Rangbah,” la bynrap u Bah Prestone.
Halor ka jingkylli, hato yn thaw neem ïa ka sorkar MDA-II da kaba ïatreilang bad ki seng saiñpyrthei kiba ladep ïatreilang mynshwa, u Bah Prestone u la ong, “ka sorkar khleh khaw lang ka dei ban don lada ka dei ka MDA-II lane da kano kano ka kyrteng ruh bad ïa kata ngin sa shim ïa ka rai bad ngin sa pyntip sha phi.”
U la pyntip ruh ba ïa ki MLA jong ka party kiba la shah jied thymmai kin sa ïakynduh lang ban shim ïa ka rai ha kaba ïadei bad ka jingïatreilang bad paralok seng saiñpyrthei bad ban shim rai ïano ban pynkhamti ïa ka shuki Myntri Rangbah.
