Thaw histori u Prah ha Mawlai, shah pynjem khnap u MLA bad MDC

0

Shillong, Lber 02: Hadien ba ki paidbah ka jong ka jylla ki la pyndep ban thep ïa ka vote jong ki bad ha kaba ïa ka jingñiew ïa ka vote la pyndep ha ka sngi Palei la ïohi ba ka Mawlai ka thaw ïa ka khana pateng jong ka namar u kyrtong jong ka VPP u Bah Brightstarwell Marbaniang u la lah ban pynjem khnap ïa ki arngut ki kyrtong radbah ba kynthup ïa u MLA barim ba la hiar shuki noh u Bah PT Sawkmie bad u MDC u Bah Teibor Pathaw da kaba pynliem ïa u kyrtong ka NPP uba dei ruh u MDC haduh 15648 vote kaba la pynkyndit ruh ïa kiba bun ki paidbah ka jylla.
Lah ban kdew ba kane ka jingjop u Bah Brightstarwell u kyrtong ka VPP uba baroh kim khmih lynti ka la pynshaïong hi ngaiñ ym tang ïa ki paidbah hynrei khamtam eh ïa ki kyrtong kiba u ïakhun pyrshah.
Haba u Mawphor u ïoh ban ïakren hadien ba la dep ban pynbna ïa ka jingjop jong u na Mawlai, u Bah Brighstarwell u la ong ba ka dei ka jingjop ki nongrim ïa ki bor pisa, ka jingjop u paidbah.
Haba kylli la ha ka jingïaid lynti jong u ha kane ka elskhon haduh ban un da lah ban pynmliem ïa ki ar ngut ki ramhaha saiñ hima na Mawlai u lap ne em ba ka don ka jingtreikam ka bor pisa u Bah Brightstarwell u la jubab, “Ha ka jingïaid lynti nga lap ba ka don ka jingthhe pisa hynrei phi la ïohi ka resol kaba la pynbna bad kane hi ka kren shai kdar ba ki bor tyngka kim treikam shuh ha Mawlai namar ki paidbah ki la sngewthuh ïa la ka iktiar ban jied nongthaw aiñ”.
Shuh shuh haba kylli la kane ka jingjop ka dei ka jingjia ryngkat ne ka dei kaba u la khim lynti lupa, “Ngam dei ba nga shu shong kli kti ne ba nga shu mih kynsan kynsan shuwa ka elekshon hynrei nga la trei ha la ka bor barit ym duna shuh ïa ka shisnem shiteng,” u la jubab.
“Ka jingjop jong ngi kum ka kynhun ïa ka case ba ngi ai pyrshah ïa ka sorkar kaba la khang ba ngin shim bynta ha ka kam saiñ hima sima ka ïarap ruh shi bynta ba ki paidbah ka Mawlai kin ithuh ïa nga,” ong u bah Brightstarwell.
Haba kylli la un dang bteng ne sahngeh noh ban hikai, “Ngin peit kat kuj ki kyndon la ka shah ne em hynrei nga kwah ban ïathuh ba ym dei ba nga hikai tang ha St Anthony’s College hynrei naduh ka por ba nga leit klas ha St Anthony’s College ruh nga la don bynta ban hikai skul,” u la ïathuh.
Haba kylli ïa ka thong kaba u don na ka bynta ka Mawlai, “Ka pule puthi, ka koit ka khiah, ka surok bad ki lynti synkien bad ka um ki dei kiba donkam kyrkieh eh ha ha Mawlai hynrei nga kwah ban ong ba kum u nongthaw aiñ ba la jied da u paidbah Mawlai ngan kren bad pyrshang ruh ban peit ïa ka jylla baroh namar lada kiew ka Mawlai sa katba kiew hynrei lda ka jylla ka ngam ka Mawlai ruh kan ngat ha kata ka apot bad namar kata ngan ym ong eh ba ngan trei tang na bynta ka Mawlai hynrei na bynta ka jylla hi baroh kawei,” u la ong.

Leave A Reply

Your email address will not be published.