Shillong, Lber 02: Ka Voice of People Party (VPP) ha ka sngi Palei ka la pynpaw ïa ka jingbym hun halor ka rukom ñiew ïa ka vote ha Mylliem Constituency ha kaba ka kyrtong ka party ka Kong Aibandaplin F Lyngdoh ka la shah rem noh ha u kyrtong ka Congress u Bah Ronnie V Lyngdoh.
Ha ka shithi sha u Chief Electoral Officer (CEO) u Bah FR Kharkongor, u General Secretary ka VPP u Dr Ricky AJ Syngkon u la ong, “ha ka kyrteng ka kyrtong ka party na Mylliem k Kong Aibandaplin F Lyngdoh, Nga kyrpad ïa phi ban ñiew biang ïa ka vote na Mylliem Constituency na ka daw ka jingdkhoh ka rukom ïa ka jingdon ki vote kiba wan thep bad ka jingñiew pat ïa ki.”
U la ong ba kat kum ka jingai jingtip u counting agent na ka miej no 4 ba ka kor EVM na ka polling station no 44 Mawrie B la lap ba ka don ha ka ON mode kaba ha ka jingshisha ka dei ban long ha ka OFF mode.
Shuh shuh u la ong ba, ha ka polling station No 8 Nongkseh Pyrda bad Lumpdeng B, ba u returning officer u la bthah ba ka jingñiew ïa ka vote kan dei da ka VVPAT slip ha ka jaka ban ñiew na ka EVM hana ba la aidaw ba ka don ka jingthut ka kor EVM.
“Ha ka jingshisha ka dei ban pynbeit ïa kane ka jingtut ka kor EVM, bad ba ka jingñiew kan dei na ka EVM kumba leh sha kiwei pat,” ong shuh shuh u Dr Ricky.
“Dei halor katei ka daw ba ka la pynartatien halor ka jingñiew ïa ki vote kiba ka kyrtong jong ngi ka ïoh, namarkata, ngi sngewdei ban kyrpad ba phin leh ïa kaba donkam halor kane kumba ngi la kdew sha khmat,” u la bynrap.
