Shillong, Lber, 02: Lai ngut ki President jong ki seng saiñpyrthei ki la shah pynliem lyndang ha ka elekshon sha ka Ingdorbar Thawaiñ ha ka jingpynbna resol ha ka sngi Palei.
U President ka Meghalaya Pradesh Congress Committee (MPCC) u Bah Vincent H. Pala uba long ruh u MP jong ka Shillong Lok Sabha Constituency u la shah pynliem lyndang ha ka kyrtong jong ka National People’s Party (NPP) ka Santa Mary Shylla kaba la ïoh khur vote da 16974. Katba u Shitlang Pale uba long u kyrtong ka United Democratic Party (UDP) bad u MLA ka Sutnga-Saipung u la poi ha ka kyrdan kaba lai da kaba ïoh khur vote 10453, katba u Bah Pala u la poi ha ka kyrdan kaba ar da kaba ïoh 15146.
Ha Rambrai-Jyrngam Constituency, u kyrtong Independent u la ïoh ïa ka jingjop da kaba ïoh khur vote 9057 hajar, katba u Bah K. Phlastingwell Pangniang uba long u President ka Hill State People’s Democratic Party (HSPDP) u la poi ha ka kyrdna kaba ar bad ïoh khur vote 8947 hajar bad u MLA barim u Bah Kimfa S. Marbaniang uba long u kyrtong ka NPP u la poi ha ka kyrdan kaba lai bad ïoh khur vote 7272 hajar.
U State President ka BJP u Bah Ernest Mawrie uba long u kyrtong ka seng BJP na West Shillong Constituency u la shah pynliem lyndang da kaba ïoh khur vote 3771 hajar katba u Bah Paul Lyngdoh uba long u kyrtong ka UDP uba la long u lahduh ha kane ka kynti u la ïoh khur vote 7917 hajar bad u MLA barim u Bah Mahendro Rapsang uba long u kyrtong ka NPP u la ïoh 4432 hajar bad poi ha ka kyrdan kaba ar.
Katba ki President jong ki seng saiñpyrthei kiba la ïoh ïa ka jingjop ha kane ka elekshon ki long u National President ka NPP u Conrad Kongkal Sangma uba la jop na South Tura, u President ka Voice of the People Party u Bah Ardent M. Basaïamoit uba la jop na Nongkrem, u State President ka All India Trinamool Congress u Bah Charles Pyngrope na Nongthymmai, u President ka UDP u Bah Metbah Lyngdoh na Mairang bad u President ka PDF u Bah Gavin M. Mylliem na Sohra.
