Ym ïoh jingshai ba biang ka KSU na ka tnat Pynroi Sor ïa ki sienjam ba shim ïa ka jaka mane ha jaka treikam CBI

Shillong, Risaw 12: Ka Khasi Students’ Union (KSU), Shillong Mihngi Circle, ka la phah da ka shithi sha u Director jong ka Tnad Urban Affairs, Sorkar Meghalaya, ban pan jingpynshai kaba bniah halor ki sienjam ba la shim bad kiba dang thmu ban shim halor ka jingtei ïa ka jaka mane Blei hapoh ka jaka treikam jong ka Central Bureau of Investigation (CBI) ha Mawdiangdiang.
Ka Seng ka pynkynmaw ba ha ka jingïakren kaba la long ha ka 11 tarik u Nailar, 2026, u Director jong ka Tnad Urban Affairs u la kular ban shimkhia ïa kane ka kam bad ban leit jurip ïa katei ka jaka. Hynrei, haduh mynta, katkum ka jingong jong ka Seng, kam pat ïoh ïa kano kano ka jingpynshai kaba bniah halor ki sienjam ba la dep shim bad ka jinglong jingman mynta jong kane ka kam.
Ka KSU Shillong Mihngi Circle ka pynpaw ïa ka jingsngewkhia halor kane ka bynta, khamtam haba ka Seng ka la dep ban pynpaw ïa ka jingpyrshah ïa katei ka jingtei bad ka jingdonkam ban pynshisha la ka long ne em kaba ïahap bad ki jingbit ba la ai, ki kyndon jong ka jingïateh kular bad ki aiñ kiba treikam.
Ka Seng ka kdew ruh ba ki bor Pulit ki la khot hajir ïa ki nongïalam jong ka KSU Shillong Mihngi Circle ha kaba ïadei bad kane ka mat. Kumta, ka Seng ka kwah ban tip la ka Tnad Urban Affairs ka la shim ne em ïa ki sienjam kiba donkam katkum ka aiñ halor katei ka jingtei.
Katkum ki jingtip kiba don ha ka kti jong ka Seng, ka jingïateh kular halor ka jingpyndonkam ïa katei ka jaka ka kdew ba ka jingbit ka long na ka bynta ban tei ïa ki jingtei kum ka residential complex bad office complex. Hynrei, katkum ka jinglap jong ka Seng, katei ka jaka ka kynthup ruh ïa ka jaka mane Blei. Kane ka pynmih ïa ki jingkylli kiba donkam ïa ka jingpynshai halor ka jingbit ba la ai bad ka jinglong katkum ki kyndon aiñ.
Ha kaba ïadei bad kane, ka KSU Shillong Mihngi Circle ka la pan jingpynshai halor san tylli ki mat ba kongsan, kiba kynthup ïa ka jingjurip ba la pynlong ha katei ka jaka bad ki jingmih jong ka; ki jingbit bad ki kyndon kiba ïadei bad ka jingtei ïa ka jaka mane Blei; ka jingmynjur jong ka Dorbar Shnong kaba dei peit ïa katei ka jaka; ki sienjam katkum ka aiñ lada lap ïa kino kino ki jingpynkheiñ; bad ki daw kiba la pynslem ïa ka Tnad ban ai jingpynshai bad shim ïa ki sienjam kiba donkam.
Ka Seng ka pynpaw shai ba ka nongrim jong ka ka long ban pyrshah ïa kano kano ka jingtei kaba pynkheiñ ïa ki kyndon jong ka jingïateh kular, ki jingbit ba la ai bad ki aiñ kiba treikam. Kumta, ka kyntu ïa ka Tnad Urban Affairs ban tohkit bniah ïa kane ka kam bad ban shim ïa ki sienjam kiba dei katkum ka aiñ lada lap ba don kino kino ki jingpynkheiñ.
Ka KSU Shillong Mihngi Circle ka dawa ïa ka jingpynshai kaba shai, kaba bniah bad kaba shong nongrim halor ki jingshisha, khnang ba ka Seng kan tip ïa ki sienjam ba la dep shim bad ïa kiba dang thmu ban shim da ka Tnad halor kane ka kam.
Shuh shuh, ka Seng ka kyntu ïa ka Tnad ba kan pynïaid ïa kane ka kam sha khmat khlem ka jingpynslem kaba khlem daw. Ka Seng ka pynpaw ba lada kam ïoh ïa ka jingpynshai kaba biang bad ki sienjam kiba donkam hapoh ka por kaba biang, kan hap ban pyrkhat ïa kiwei pat ki sienjam kiba kham tyngeh, hynrei kiba long katkum ka aiñ, ban pynsngew ïa kane ka mat bad ban dawa ïa ka jingpynbeit kaba dei.
Ka KSU Shillong Mihngi Circle ka khmih lynti ba ka Tnad Urban Affairs kan shimkhia ïa kane ka kam bad ai ïa ka jubab kaba shai halor ka jinglong jingman jong kane ka kam, khnang ba ka jingshisha bad ka jinglong katkum ka aiñ kin paw shai ha khmat jong baroh, ong ka kyrwoh ba la phah da u Samla Celestine Rynghang Assistant General Secretary, Khasi Students’ Union, Shillong Mihngi Circle.