Shillong, Lber, 02: Arngut ki MLA jong ka BJP, u Bah AL Hek bad u Bah Sanbor Shullai ha ka sngi Palei ki la jop biang ïa ka elekshon sha ka Iingdorbar Thawaiñ Jylla na Pynthorumkhrah bad South Shillong Constituency.
Ha ka jingïakren bad ki lad pathai khubor u Bah AL Hek u la ong, ‘nga sngewkmen haduh katta katta ïa ka jingjop jong ka BJP watla ngi la khmihlynti ban jop kham bun ki Seat.”
U Bah AL Hek u la jop ïa u kyrtong ka Seng Congress u Bah PN Syiem. U la kyntait ruh mardor ban kynthoh eiei halor ka jingpynrem ïa la u jong u pyrsa kur u Bah Rocky Hek uba la ïakhun na ka NPP. “Kane ka dei ka kam iing kam se bad kan sah ruh bad ka iing ka sem,” ong u Bah AL Hek.
Ha kaba ïadei bad ka jingthaw ïa ka Sorkar, u Bah AL Hek u la ong, ïa ka rai yn sa shim da ki nongïalam bahalor jong ka Party.
Haba pynpaw ïa ka jingsngew kmen halor ka jingjop biang ha ka sien kaba saw, u Bah Sanbor Shullai, u la ong, “nga sngewkmen bad nga duwa ïa u Blei lyngba ki jingkyrkhu jong u, nga la jop biang sa shisien ha kane ka elekshon MLA da kaba ïoh 11,600 vote bad nga dei ban ai khublei bad nga sngewnguh shikatdei eh ïa ki nongthep vote jong ka South Shillong kiba la ai ka jingshahniah hapoh ka jingïalam jong nga.”
“Namarba ki paidbah nongthep vote ki dei kiba stad, ki la ai jingkyrkhu ïa nga bad ki long kiba laitluid ban ïakynduh ruh ïa nga ha kano kano ka por ba ki donkam. Ngam ju ri ksew lane pynap pahara da ki Pulit ha ka ing jong nga, ki paidbah ki long kiba laitluid ban rung wat haduh ka kamra thiah jong nga, ha kamra shetja, ha ka ophis treikam jong nga khnang ba kin dup lah ban pynpaw ïa ki jingeh markhmat bad nga,” u la ong.
U la ong shuh shuh ba ki paidbah ka jylla Meghalaya ki la pdiang ïa ka BJP bad ka jingïoh vote jong ka Party ka la nang kiew. “Nga kyrmen ba ha ki snem ki ban sa wan, ka BJP kan ïoh thaw beit ïa ka Sorkar,”u la bynrap.
