Shillong, Lber, 02: U kyrtong ka Seng Congress na Pynthorumkhrah Constituency u Bah Pynshngaiñ N. Syiem ha ka sngi Palei u la kyntait war halor ka jingkynnoh ba u donkti ban shoh ïa ki nongkyrshan jong ka BJP kumba la pynsaprhiang ha ka rynsan jong ka Social Media.
Ha ka video ba la pynsaphriang ha ka Social Media, la ïohi ba ki nongkyrshan ka BJP ki la shah byrngem byrsit ha ki nongkyrshan ka seng Congress katba ki dang ïaid da ki kali na ka shnong Chandmari hadien ba la wan phai na ka jaka ñiew vote na madan Polo ha ka por janmiet bad tem pynheh ïa ka sur jingrwai da ka jingkmen hadien ka jingjop jong u Bah Alexander L. Hek.
U Bah Pynshngaiñ haba pynshai halor kane ka jingshah kynnoh u la ong, “halor ka jingpynsaphriang (ïa ka video) ha ka Social Media ba jrong kti u Bah Pynshngaiñ bad ki nongkyrshan jong u, na ka liang jong nga, nga don ban pynshai kumne ha ka jingshisha kam don kano kano ka jingjrong kti na ka liang jong nga hynrei ka don ka jingïakajia hapdeng ki nongkyrshan jong ka Congress party bad jong ka BJP bad na ka liang jong nga, nga la mareh wut wut ban tem ïa kane ka jingïakajia khnang ba kan ym don kano ka jingsngewsih.”
“Ha kajuh ka por nga pynrem jur ïa kine kiba pynsaphriang ïa kine ki social media ki bym don nongrim bad kiba ktah ïa ka burom jong nga kum u rangbah,” la bynrap u Bah PN Syiem.
