Jop 2 ka NPP, 2 Congress, 1 UDP na Ri Bhoi, khlem poi pyrkhat shah pynrem u Bah George B. Lyngdoh na Umroi

Nongpoh, Lber 02: Ha kane ka kynti jong u snem 2023 ba ki paidbah ka jylla ki la pynthymmai ban jied biang ïa kita ki nongmihkhmat sha ka ïing Dorbar thaw aiñ ka jylla bad kumba long ha Ri Bhoi District hadien ba la pynbna noh mynta ka sngi ïa ka Result ka party Congress bad ka Party NPP ki la ioh ban khur mar 2 seat bad ka UDP ka la jop tang shi seat na ki 5 tylli ki Constituency kiba don ha Ri Bhoi.
Kiba bun balang ki la ïa kren ka dei ka jingbym poi pyrkhat ba u MLA ka Umroi, u Bah George B. Lyngdoh u la shah pynrem noh ha u kyrtong ka NPP, u Bah Damanbait Lamare.
Ki kyrtong kiba la jop ha kane ka kynti hadien ba la jied thymmai da ki paidbah ki kynthup ïa u kyrtong ka UDP bad uba dei ruh u Sitting MLA ka Nongpoh, u Bah Mayral Born Syiem uba la ioh khur haduh 14940 votes bad kaba wan baar ka dei ka Kyrtong ka Congress, ka Kong Rona Khymdeit kaba la ioh ba khur 8254 vote.
U Kyrtong ka NPP na Umroi, u Bah Damanbait Lamare u la pynrem noh ïa u Bah George B. Lyngdoh da kaba u la ioh ban khur haduh 13943 vote ba u Bah George B. Lyngdoh u la ioh ban khur tang 12311 vote. Ha Jirang Constituency, u Bah Sosthenes Sohtun, Sitting MLA ka Jirang bad u kyrtong ka NPP u la shah jied biang kum u nongmihkhmat ha ka sien kaba ar da kaba u la pynrem noh ïa u kyrtong ka Congress da ka 12690 vote bad u kyrtong ka Congress, u Bah Adrian L. Mylliem u la ioh khur tang 11067 vote.
Kiwei dei ki kyrtong kiba la ioh khur ïa ka nap jop ha kane ka election ki kynthup ïa u MLA barim ka Umsning, u Dr. Celestine Lyngdoh uba la ioh khur haduh 9907 vote bad uba wan baar pat u dei u kyrtong ka UDP, u bah Sunshine Makri uba la ioh ban khur 8743 votes. Na ka liang u kyrtong ka Congress bad MDC ka Mawhati u la ioh ban khur bun bha ka jingjop da kaba u la ioh khur haduh 13273 vote bad u kyrtong ka NPP, u Bah Shemphang Lyngdoh uba wan ha ka kyrdan kaba ar u la ioh ban khur ïa ka 8029 vote.
Shuh shuh, kitei ki kyrtong kiba la jop ha kane ka kynti ki dei kiba la ai rai da ki paidbah jong ki 5 tylli ki Constituency bad kumba long ha Ri Bhoi District, ha kane ka kynti ba la pynbna ïa ka result jong ka election 2023 mynta ka sngi baroh ki paidbah ki pdiang ïa ka jingai rai ki paidbah ba ki la pynjop ïa kita ki kyrtong bad haba phai sha ka Umroi Constituency kiba bun ki paidbah ki don hapdeng ka jinglyngngoh ha kaba kim poi pyrkhat ba u kyrtong ka NPP, u bah Damanbait Lamare un pynrem ïa u Bah George B. Lyngdoh, uba dei u kyrtong ka TMC bad uba baroh ki khmih lynti ba un dang jop biang ha kane ka kynti na Umroi Constituency.
Na ka liang kitei ki kyrtong kiba jop kila kren ruh halor ka jingangnud jong ki ban trei naka bynta ka constituency, khamtam ïaka roi ka par haki constituency bad ka district hi baroh kawei.