Nongpoh, Risaw 12: Ka BJP Umroi Mandal hynne ka sngi ka la pynlong ïaka program pyndonburom ïaki nongtreimon sngewbha kiba ju trei naka bynta ka imlang ka sahlang naduh ki nongtrei ASHA, ki Anganwadi Workers bad ki nongtrei Mid-day Meal.
Kane ka program ka long ruh kum ka jingithuh ïaka jingtreishitom jong ki nongtrei mon sngewbha na u Myntri Rangbah duh ka Ri u Narendra Modi ha ka jingdap 25 snem ka jingshakri jong u kum u Myntri Rangbah duh jong ka Ri.
Ha kane ka program la ïadonlang da u President ka BJP Umroi Mandal u Bah Bandari Ryntathiang, ka kong Daniella Nonglait, State Secretary ba dei peit ruh ïaka Ri-Bhoi District, u bah Bah Sen Thabah President BJP Ri-Bhoi bad kiwei kiwei ki riew rangbah kynthup ïa u Bah Sunlight Shadap General Secretary Bhoirymbong Pyllun.
La wan ban ïa shimbynta naduh ki nongtrei ASHA, ki nongtrei Anganwadi, ki nongtrei Mid-day meal lem bad kiwei kiwei.
Ha katei ka jingïalang, naka liang ka ki longkmie ki la pynsngew ïaki jingeh hakaba ïa dei bad ka kam kaba ki trei.Ki la pynsngew ruh ba ïaka kam kaba ki ju trei la ong kum ka kam treimon sngewbha hynrei ka jingshah ibeiñ haka kam bad ka jing shah hukum kam ïahap shuh bad ka jingsiew kaba ki ioh.
Nalor kata, ki la pynsngew ruh ba ka kam kaba ki trei bunsien ki hap ban trei lyngba ki Mobile phone katba ka mobile kaba ki ïoh kam long wat tang ban pyndep ïa kita ki kam bad nalor kata ki hap ruh ba mat shibun ki jingeh khamtam haki jaka kyndong bym ju don ki network mobile.
Naka liang ki nongïalam ka BJP ki la pynsngew ba ïa kine ki jingeh baroh jong ki nongtrei mon sngewbha kin sa pyntip sha ka bor sorkar bad ban ïa kren ruh halor kine ki jingeh jong ki.
