Nongstoiñ, Risaw 12 : Ha kaba ïadei bad ka dur khih kaba la mih ha kine ki khyndiat sngi lyngba ki rynsan social media, ha kaba ka don ka jingjia kaba hap katkum ka kyndon POCSO bad IT Act kaba la jia ha thaiñ Mawshynrut, na ka liang ki pulit ka West Khasi Hills ki la register case mynnin ka sngi ha Mawshynrut Police Station Case No. 19(10)2026 U/s 64(2) (m)/351(3) BNS R/w Section 5(1)/6/15 POCSO Act R/w Sec 67 B IT Act, ha kaba ka jingtohkit ka dang ïaid shakhmat.
Na ka liang ka tnad pulit jong ka West Khasi Hills, ka la kyntu ïa baroh ba kim dei ban pynsaphriang ïa kiba kum kitei ki jait dur khih bad ba ki dei ruh ban pynduh noh mar mar, namar ka jingpynsaphriang klumar ïa ki dur khih ba long pyrshah ïa ka aiñ, ka long pyrshah ïa ki kyndon jong ka Bharatiya Nyaya Sanhita bad Information Technology Act bad kiba pynsaphriang khlem artatien kin shah kem.
Kawei pat ka long ba lada la pynsaphriang lane pynpaw noh ïa ka kyrteng lane ka dur khih jong ka nongshah leh kam sniew dei ban ïada, kiba pynsaphriang kin hap ban ngat ha ka jingpynsaja. Nalorkata, la kyntu ba ym dei ban thad ma dei mata khlem da lah ban pynshisha ne ban pynsaphriang klumar, namar kan ktah ïa ka jingtohkit kaba dang ïaid shakhmat.
Ha kajuh ka por na ka liang ka tnad pulit ka kyntu ba lada don mano mano kiba don jingtip halor ka jingjia, kin sngewbha ban ai jingtip mar mar sha ka Police Control Room (Ph. No- 9366498499) lane phone ha u 112. Ïa kiba ai jingtip yn buhrieh kyrteng.
Sa shisien, na ka liang ki pulit ka West Khasi Hills Police ka kyntu sha baroh ban ym pynsaphriang klumar ïa ki dur khih kiba long pyrshah ïa ka aiñ. Kino kino kiba ïaleh pyrshah hap ban shim ki sien jam katkum ki lynti jong ka aiñ.
