Dawa ka AJMRWLU na ka sorkar jylla ban buhlang noh da ka Muster Roll Welfare Board kumba leh ïakiwei

By Mawphor Editor On Oct 13, 2026

Shillong, Risaw 12: Ka All Jaiñtia Muster Roll Workers’ Labour Union (CEC) Jowai, na ka bynta ka bha ka miat jong baroh ki nongtrei Muster Roll ha ki tnat sorkar bapher bapher ka la dawa na ka sorkar jylla ba kan pyndon noh la ka jong ka Muster Roll Welfare Board khnang ba kin lah ban shim ïa ki sienjam kiba kongsan na ka bynta ka bha ka miat jong ki.
Haba kren sha ki lad pathai khubor ha ka sngi Nyngkong u nongïalam ka Union u Bah Khroo Pariat u la ong ba ka seng ka ai khublei ïa u Myntri Rangbah ka jylla u Conrad Sangma, ka kynhun Myntri bad ki ophisar ba ki la mynjur ïa ka jingai jingmut ka Union ban pynbeit ïa ka rta shongthait kaba 60 snem kaba long Salonsar ïa baroh kiba trei Muster Roll.
Shuh shuh u Bah Khroo Pariat u la ai khublei ruh ia ka sorkar ba la pynduh noh ïa ka order jong u Nailur 2025 kaba buh rta shongthait haduh 65 snem.
Na ka liang jong u, haba phai sha ki jingmyntoi bai bam tymmen, u Bah Pariat u la ong ba tang kiba trei ha PWD, PHE kiba ïoh ki pension benefit hynrei kiwei pat kim ïoh bad ki trei tang na ka bynta ka bainong bylla sngi kumta donkam ban pynbeit ïa kane da ka sorkar.
U Bah Pariat u la kyrpad ïa ka sorkar ba kan pyntreikam ïa ka order rta shongthait kaba 60 snem ba kan treikam naduh u Nailur 2025 namar kila don kiba la shah pynshong thait jubor namar kito ki Muster Roll kiba pdiang ïa ka RCW ki hap shongthait noh ha ka rta kaba 58 snem.
Halor ka Employment Provident Fund (EPF) pat u la ïathuh ba u Labour Commissioner u la ai ka order sha baroh ki ophisar ban pyntreikam noh mardor ïa kane naba kadei kaba la sdang lah bun snem, hynrei na ka bynta kiba trei Muster Roll kane kan dang treikam.
Halor ka jingïatyngkhuh kam hapdeng ka Tnat Personel bad ka Labour u Bah Pariat u la kyrpad ïa ka sorkar ban ailad ha ka Tnat Labour ban peit ïa baroh ki jingdonkam jong kiba treikam muster roll la ka long ha kano kano ka rukom.
Ki Muster Roll ki dawa ruh ba dei ban pyndon noh da ka Muster Roll Welfare Board na ka bynta ka bha ka miat jong ki bad ki la kyrpad ba ka jingpyntreikam ïa ka RDA kadei ban long ha ka rukom jingsiew kaba thikna ym ban ong ba ka sorkar kam don fund naba la trei baroh shibnai dei ruh ban ka jingsiew manla u bnai ym tang ban Rai ha ki jingthoh.