Kyntu ka JSM ban buh da u QR Code/Digital Licence Verification System ban pynduh ïa ki Trading License thok

Jowai, Risaw 12: Ka Jaiñtia Students’ Movement (JSM) ka la ïakynduh bad aiti ïa ka Memorandum sha u Executive Member (EM) ma J. Suiam, In-Charge jong ka Non-Tribal Trading and Taxes, JHADC, da ka jingdawa ïa ka jingpyntreikam kaba shai bad kaba khlem jingnoh shiliang ïa ki aiñ kiba pynïaid ïa ka kam khaïi da ki non-tribal hapoh ka jingkhmih jong ka Jaiñtia Hills Autonomous District Council (JHADC).
Ka JSM kala kyntu ïa ka JHADC ban pynlong ïa ka jing khynra ïa ki Trading Licence, ïa ki Non-Tribal Employee/Service Licence, da kaba ïanujor bad ki rekod ba la buh ha ki ophis ba dei peit, khnang ban khanglad ïa ka jingpyndonkam ïa ki laisens kiba thok, la kut por, la pynsangeh, la pynkylla lane kiba khlem jingbit.
Shuh shuh ka seng kala ai jingmut ban wanrah ïa ka QR Code/Digital Licence Verification System, kaba ïasnoh bad ka official data base jong ka JHADC, khnang ban pynlong ïa ka jingpynshisha ïa ka jingtreikam jong ki license kaba kloi, kaba shai bad kaba lah ban shaniah.
Katkum kane ka rukom ba la tyrwa, baroh ki License ki dei ban don ïa ka QR Code kaba kyrpang, kaba ïasnoh bad ka official JHADC verification portal. Haba scan ïa ka QR Code, lah ban pynshisha ïa ki jingtip kum ka Licence Number, kyrteng jong u/ka license, ka jait kam khaïi, ki mar kiba la shah khaïi, ka jaka treikam, ka tarik ba la pynmih, ka por treikam, ki jingtip shaphang renewal bad ka status jong ka License.
Ka system ka dei ruh ban pyni shai lada ka license ka long ACTIVE/VALID, RENEWED, EXPIRED, SUSPENDED, CANCELLED lane NOT FOUND/NOT VERIFIED.
Ka JSM ka ngeit ba kane ka rukom treikam kan ïarap ban khanglad ïa ka jingpyndonkam ïa ki license kiba thok, la pynkylla, la kut por lane kiba ym treikam shuh, bad kan pynkhlaiñ ïa ka jingshaniah paidbah ha ka rukom ai license.
Ka JSM ka dawa jur na u EM ba ym dei ban ai Trading Licence ïa ki non-tribal na ka bynta ki kam, ki service lane ki business kiba lah ban trei da ki trai Ri, kiba don ka jingnang jingstad bad ka bor ban trei, katkum ka aiñ bad ki bor kiba la pynkup ha ka JHADC.
Ka Movement ka la kyntu ruh ïa ka JHADC ban pynlong ïa ki jingpeit bniah bad jingpynshisha kiba man ka por bad ban shim ïa ki sienjam kiba dei pyrshah ïa kino kino ki jingpynkheiñ ïa ka aiñ, da kaba bud ryntih ïa ka aiñ bad ka due process.
“Ka jingdawa jong ka JSM ka long kaba shai: pynshisha ïa ka license, pynshisha ïa ka record ba la buh ha ophis, bad pyntreikam ïa ka aiñ katkum ka due process. Ka rukom pynshisha daka ba buh ïa u QR CODE/Digital Licence Verification System kaba shai ban pynkhlaiñ ïa ka jing shaniah paidbah bad kan pynduna ïa ka jinglah ban pyn donkam ïa ki license kiba thok lane kiba ym treikam shuh.”