Khliehriat, Lber 2 : Ka kong Santa Mary Shylla, kaba na ka shnong Byndihati, kaba dei ruh ka kyrtong jong ka party National People’s Party, ka la jop donburom ïa kane ka Meghalaya Legislative Assembly election 2023, na ka 5- Sutnga Saipung Constituency, ha kaba ka la pynliem ïa u bah Vincent H Pala, uba dei u MP jong ka Loksabha bad u MLA ba rim u bah Shitlang Pale.
Katei ka kyrtong ba jop, ka la ïoh ïa ka vote haduh 16974, ka la pynrem ïa u MP, Vincent H Pala, da kaba ka la ïoh tam ïa ki vote haduh 1828, ha kaba u bah Vincent Pala u la ïoh 15146 ki vote na ki paidbah ka constituency.
Haba kren sha ki pathai khubor, ka kong Santa Mary Shylla, ka la ai khublei ïa ki paidbah nongkyrshan, kiba la kyrshan radbah ïa ka bad kiba la iatrei shitom shisha na ka bynta jong ka, kiba la ailad ruh ïa ka kum ka longkmie bad ka la kular ruh ba kan trei shitom na ka bynta ki paidbah.
Ki don saw ngut ki kyrtong kiba la iakhun ïa kane ka election na ka 5 Sutnga Saipung Constituency ba kynthup katei ka kyrtong kaba jop, ka kong Santa Mary Shylla, NPP, u bah Vincent H Pala, uba ïakhun na ka party Congress, u MLA ba rim, u bah Shitlang Pale, uba la ïoh 10453 vote, u bah Krison Langstand, na ka party BJP, uba la ïoh 424 vote bad ki 416 vote ki leit sha ka NOTA.