Bun ki skul ba khlem don nonghikai : Sdang ka Mass Casual Leave ba 3 sngi ba la pynbna da ka KJDSTA & GHDSTEA

Shillong, Risaw 13: Ka Khasi Jaiñtia Deficit School Teachers’ Association (KJDSTA) bad ka Garo Hills Deficit School Teachers and Employees Association (GHDSTEA), ki la sdang ban ban pynlong ïa ka Mass Casual Leave kaba lai sngi lane ka jingsangeh hikai bad leit trei naduh ka 13 tarik ka sngi baar haduh ka 15 tarik u Risaw 2026.
Ha kane ka sngi sdang la ïohi ba naduh mynstep bun tylli ki kamra klas ki la don khlem ki nonghikai bad la iohi ba ki khynnah skul ruh ki la shu ia shongkai khlem da don satia kiba hikai bad don ruh ki kamra klas kiba thylli bad don tang ki ben thylli bym don ba shong wat ki khynnah skul ruh.
Lah ban pynkynmaw ba katkum ka jingpynbna jong u President ka KJDSTA, u Babu Boswell Pala, ha ka 12 tarik u Risaw, 2026, kine ki ar tylli ki Association ki la rai ban bteng ïa ka jingïakhih hadien ba kim shym la ïoh ïa ka jubab kaba biang bad kaba pynhun na ka liang ka Sorkar Meghalaya halor ki mat ba ki la pynpaw.
Ka KJDSTA ka la ong ba ka la ïoh ïa ka shithi na u D. Lyngdoh, Joint Secretary ka Sorkar Meghalaya, Education Department, ha ka 8 tarik Risaw, kaba jubab ïa ka dorkhas kaba ki la ai sha u Myntri Rangbah Conrad K. Sangma ha ka 25 tarik Nailur 2026.
Hynrei, katkum ka seng, ka shithi kam shym la jubab ïa ki mat jingdawa ba kongsan kiba ki la pynpaw.
Ka KJDSTA ka la ong ba kawei na ki mat jingdawa ka long ban weng noh ïa ka Scheme 2026 bad ban pynïoh biang ïa ka Board of Trustees (BOT).
Hynrei, ka shithi na ka Education Department ka la kren shaphang ka jingpynrung PRAN, kaba katkum ka seng ka dei hi ka bynta jong ka jingpyntreikam ïa ka Scheme 2026.
Haba ïadei bad ka BOT, ka shithi ka la kdew ba ki nonghikai bad nongtrei deficit la pynrung hapoh ka Board kaba la thaw ha ka 27 tarik u Ïaïong 2026, hynrei ïa kane kam shym la pdiang da ka Association.
Ka Association ka la kynnoh ruh ba don kiwei pat ki mat jingdawa kiba ka Sorkar kam shym la ai jubab satia.
Namar kata, ka KJDSTA bad GHDSTEA ki la rai ban bteng ïa ka prokram jingïakhih bad ki la kyntu biang ïa ka Sorkar ba kan peit bniah ïa ki mat jingdawa jong ki, namar ki ngeit ba kine ki long ki mat kiba ïahap.
Ki Association ki la ong ba ki long kiba kloi ban ïakren bad ka Sorkar ban pynbeit ïa ki jingeh bad kyntu ruh ïa baroh ki nonghikai bad nongtrei deficit ban ai jingkyrshan bad ïa ki kmie ki kpa bad ki khynnah skul ban ïaishah halor kane ka jingpynlong Mass Casual Leave kaba lai sngi.
Halor kane ka sngi sdang haba kren bad u President ka KJDSTA u Babu Boswell Pala u la iathuh ba kumba u la ïoh jingtip kane ka jingsangeh hikai kaba lai sngi kaba la sdang mynta ka sngi ka la long kaba jop ha kaba kumba jan 100% ki nonghikai ki khlem leit satia sha ki skul ban leit hikai.
“Katkum ka jingïoh jingtip jong nga kane ka jingïakhih ka la long kaba jop naba la jan 100% na ki nonghikai ki la shim bynta ha kane ka jingïakhih bad ngi kyrmen ba kin dang bteng ban ïai kyrshan ïa kane ka jingïakhih tat haduh ka 15 tarik mynta u bnai khnang ban pynbor ïa ka sorkar ba kan sngap ïa ki jingdawa jong ki, kiba shong nongrim bad kiba ïahab,” ong u Babu Pala.