Nongpoh, Jymmang 11: Ka long ka jingkmen kaba khraw ïaka shnong Tomonpo Anglong kawei naki shnong kham pajih na ka sor Nongpoh kaba dang donkam shibun ki kam pynroi kala ioh ban plie paidbah ïa kawei ka iing dorbar ba ka shnong kan ioh ban pyndonkam ban pynlong ki jingïakynduh bad jingïalang jong ka shnong bala tei lyngba ka skhim MGNREGA bad SRWP haka jinglut kumba 5.56 lakh tyngka.
Ïa katei ka iingdorbar la wan ban plie paidbah da u Bah Mayral born Syiem MLA ka Nongpoh kum u kongsan haka jingdonlang u Bah Eric Dkhar BDO ka Umling C&RD Block, Rihen Klein Rangbah Shnong ka Tomonpo Anglong, bad kiwei kiwei ki riew rangbah jong ka shnong bad ka thaiñ hi baroh kawei ryngkat ki longkmie, ki longkpa bad ki khun samla jong ka shnong.
Haba kren ha katei ka sngi naka liang u Bah Mayral Born Syiem MLA ka Nongpoh u la pynpaw ka jingsngewkmen kaba khraw ban iohi ba katei ka shnong kala ioh ban pyndep hok ïa katei ka ïingdorbar kaba dei kawei naki jingdonkam jong ka shnong ba kum u MLA u la shimkhia ban pynmang kyrpang ïaka skhim lyngba ka SRWP kaba 2.50 lakh bad ban pynbit pynbiang shuh shuh naka liang ka shnong kala pynrung lang ruh ïaka skhim MGNREGA haka jinglut kumba 3.6 lakh.
Kum u MLA u la ong ruh ba kane kam dei ka jingkut bad shibun ki kam pynroi kin dang wan ha katei ka shnong, kumba katei ka shnong ka dang donkam shibun ki jingïarap, bad un dang pyrshang ban buddien ïaki jingdonkam jong ki paidbah lada ki paidbah ki ai ka jingïatreilang ryngkat ryngkat.
Shuh shuh naka liang u MLA u la kyntu ruh ïaki paidbah ba kin sumar hok ïa katei ka iingdorbar khnang ba kan neh bad pynsuk ïaki paidbah kaba long ka jingmyntoi jong ka shnong ka thaw hi baroh kawei ban pynneh pynsah ïa ki skhim kiba wan naka sorkar.
