Plie u Bah Metbah Lyngdoh ïa ka ïing skul thymmai ka Tirot Sing Mem. Govt. UPS

Mairang, Jymmang, 11: U Chairman jong ka Meghalaya State Planning Board u ba long ruh u MLA ka Mairang Constituency, u Bah Metbah Lyngdoh, hynne ka sngi u la ïoh ban plie ïa ka ïing skul kaba thymmai jong ka skul Tirot Sing Memorial Government Upper Primary School, Nongkhlaw.
Ha kane ka sngi la don bad ryngkat u Deputy Commissioner ka Eastern West Khasi Hills District, u Bah G. Kharmawphlang, u Syiem ka Hima Nongkhlaw, u Pa’iem P.M Syiemlieh, District School Education Officer ka West Khasi Hills District, I Kong L. Syiemlieh, u Sub-Divisional School Education Officer ka Eastern West Khasi Hills District, u Bah J.Thyrniang, u Headmaster jong ka skul, u Bah W.Warjri, ki nongïalam shnong, ki nonghikai, ki khynnah skul bad ki paidbah ka thaiñ.
Kane ka ïing skul kaba thymmai ka kynthup ïa ki 5 tylli ki kamra bad la kyrmen ba ka jingplie ïa kane ka ïing skul kaba thymmai, kan pynïoh ïa ka jaka pule bad hikai kaba kylluid bad kaba paka na ka bynta ki khynnah pule bad ki nonghikai jong kane ka skul.
Haba kren kum u kongsan ha kane ka prokram, u Chairman ka Meghalaya State Planning Board u ba long ruh u MLA ka thaiñ, u Bah Metbah Lyngdoh u la ai khublei ïa ki dkhot ka Managing Committee jong ka skul, khamtam eh ïa u Head Master na ka bynta ka jingtrei shitom jong ki, kaba la wanrah ïa u soh ba thiang lyngba ka jingïoh jong ka skul ïa kane ka ïing skul kaba thymmai.
U la pynpaw ruh ïa ka jingkyrmen ba kane ka ïing skul ïa kaba la plie ha kane ka sngi, kan ïarap ban pynjanai shuh shuh ïa ka pule dangle ha kane ka skul na ka bynta ka jingmyntoi jong ki nonghikai bad ki khynnah pule kumjuh.
U la ong ruh ba dang bun shuh kiwei kiwei kiba dang dei ban leh kum shibynta ban kyntiew shuh shuh ïa kane ka skul, na ka bynta kata ka donkam ïa ka jingïatreilang jong baroh ki nonghikai, ki kmie ki kpa bad ki tnad sorkar.
Shuh shuh, u Bah Metbah u la kren ruh shaphang ka juk stad teknoloji bad u la kyntu ïa ki khynnah pule, ba kin shim ïa kaba bha tam ba ka bor teknoloji ka don ban ai bad ruh ban husiar bad kiar raimaw raidieng na ki jingsniew ba ka teknloji ka wanrah.
U Deputy Commissioner ka Eastern West Khasi Hills District, u Bah G. Kharmawphlang ha ka jingkren ka jong u kum u symbud kongsan, u la kren halor ka jingdonkam jong ki nonghikai ba kin peit thuh lypa ïa ki sap bad talen ba kyrpang jong ki khynnah skul naduh ka por ba ki dang rit, khnang ba kin ïoh pynjanai shuh shuh ïa la ki sap ki phong ki jongki hadien habud, la ka long ha ka pule puthi ne ki kam ïalehkai.
U la kyntu ruh ïa ki ba kin pynrung ha ka jingmut jong ki khynnah pule ïa ka mynsiem ïakhun jong u Tirot Sing Syiem, u ba long ym tang u riew khraw jong ka jaidbynriew hynrei wat hapoh ka Ri Indïa hi baroh kawei.
Kiwei kiwei pat kiba la kren ha kane ka sngi ki kynthup ïa u Syiem ka Hima Nongkhlaw, u Pa’iem P.M Syiemlieh, I District School Education Officer ka West Khasi Hills District, I Kong L.Syiemlieh, u Sub-Divisional School Education Officer ka Eastern West Khasi Hills District, u Bah J. Thyrniang, u Headmaster jong ka skul, u Bah W.Warjri bad u Sordar jong ka shnong Nongkhlaw, u Bah K. Dkhar.